Іаана 17 Іаана 17 разьдзел

¹ Ісус прамовіў гэта і, узвёўшы свае вочы ў неба, сказаў: Татухна, надышла гадзіна; праслаў Твайго Сына, каб Сын праславіў Цябе,

² як Ты даў Яму ўладу над усякім целам, каб усяму, што Ты даў Яму, Ён даў вечнае жыццё.

³ І гэта — жыццё вечнае, каб пазналі Цябе, адзінага праўдзівага Бога, і Таго, Каго Ты паслаў: Ісуса Хрыста.

⁴ Я праславіў Цябе на зямлі, скончыўшы работу, якую Ты даў Мне зрабіць.

⁵ І цяпер праслаў Мяне Ты, Татухна, у Цябе Самога славаю, якую Я меў у Цябе раней, чым быў свет.

⁶ Я адкрыў Тваё імя людзям, якіх Ты даў мне ад свету. Яны былі Твае, і Ты іх даў Мне, і Тваё слова яны збераглі.

⁷ Цяпер яны зразумелі, што ўсё, што Ты даў Мне, — ад Цябе;

⁸ бо словы, якія Ты даў Мне, Я даў ім, і яны прынялі і зразумелі праўдзіва, што Я ад Цябе выйшаў, і ўверавалі, што Ты Мяне паслаў.

⁹ Я за іх малю, не за ўвесь свет малю, але за тых, каго Ты даў Мне, бо яны — Твае.

¹⁰ І ўсё Маё — Тваё, і Тваё — Маё, і Я праславіўся ў іх.

¹¹ І Я ўжо не ў свеце, а яны ў свеце, і Я да Цябе іду. Татухна Святы, зберажы іх у Тваім імені, якое42 Ты даў Мне, каб яны былі адно, як [і] Мы.

¹² Калі Я быў [у свеце] з імі, Я бярог іх у Тваім імені, якое42 Ты даў Мне, і збярог, і ніхто з іх не загінуў, акрамя сына пагібелі, каб спраўдзілася Пісанне.

¹³ А цяпер да Цябе іду і кажу гэта ў свеце, каб яны мелі Маю радасць у сабе поўную.

¹⁴ Я даў ім Тваё Слова, і свет зненавідзеў іх, бо яны не ад свету, як Я не ад свету.

¹⁵ Я не малю, каб Ты ўзяў іх са свету, а каб збярог іх ад ліхога.

¹⁶ Яны не ад свету, як Я не ад свету.

¹⁷ Асвяці іх [Тваёю] праўдаю: Тваё слова — праўда.

¹⁸ Як Ты паслаў Мяне ў свет, і Я паслаў іх у свет;

¹⁹ і за іх Я прысвячаю Самога Сябе, каб і яны былі асвечаны праўдаю.

²⁰ І не толькі за іх малю, але і за тых, што ўверавалі ў Мяне паводле іх слова,

²¹ каб усе яны былі адно, як Ты, Татухна, ува Мне, і Я ў Табе, каб і яны ў Нас былі [адно], каб увераваў свет, што Ты Мяне паслаў.

²² І славу, якую Ты даў Мне, Я ім даў, каб яны былі адно, як Мы адно;

²³ Я ў іх, і Ты ўва Мне, каб яны былі ў дасканаласці адно, каб пазнаў свет, што Ты Мяне паслаў і палюбіў іх, як Мяне палюбіў.

²⁴ Татухна, хачу, каб тыя, каго даў Ты мне, са Мною былі, дзе Я, каб яны бачылі Маю славу, якую Ты даў Мне, бо палюбіў Мяне яшчэ да заснавання свету.

²⁵ Татухна Праведны, і свет Цябе не пазнаў, а Я пазнаў Цябе, і яны пазналі, што Ты Мяне паслаў;

²⁶ І Я абвясціў ім Тваё імя і буду абвяшчаць, каб любоў, якою Ты палюбіў Мяне, у іх была, і Я ў іх.