Ісуса сына Нава 12 разьдзел

 

 

Вось цары той зямлі, якіх пабілі сыны Ізраілевыя і зямлю якіх узялі ў спадчыну па той бок Ярдана на ўсход сонца, ад патока Арнона да гары Эрмона, і ўсю раўніну на ўсход:

 

Вось валадары той зямлі, якіх забілі сыны Ізраіля і завалодалі зямлёю іхняй за Ярданам, на ўсход сонца, ад ручая Арнон аж да гары Гермон, разам з усёй Арабай на ўсходзе.

Сігон, цар Амарэйскі, які жыў у Эсэвоне і валодаў ад Араера, што каля берага патока Арнона, і ад сярэдзіны патока палавінаю Галаада, да патока Явока, мяжы Аманіцянаў,

 

Сыгон, валадар Амарэйцаў, які жыў у Хешбоне і валодаў паловай Гілеаду ад Араэру, што на беразе ручая Арнон, ад сярэдзіны даліны аж да ручая Ябок, мяжы сыноў Амона,

і раўнінаю да самага мора Хінэрэцкага на ўсход і да мора раўніны, мора Салёнага, на ўсход па дарозе да Бэт-Эшымота, а на поўдзень мясьцінамі каля падножжа Фасгі.

 

а на ўсходзе праз Арабу аж да мора Кінэрэт і мора Арабы або Мора Салёнага, у напрамку Бэт-Гаешымоту, і далей на поўдзень да падножжа Пісгі.

Сумежны Ог, цар Васанскі, апошні з Рэфаімаў, які жыў у Астароце і ў Эдрэі,

 

Пасьля Ог, валадар Башану, апошні з Рэфаімаў, які жыў у Аштароце і ў Эдрэі,

і валодаў гарою Эрмонам і Салхою, і ўсім Васанам, да мяжы Гесурскай і Маахскай, і палавінаю Галаада, да мяжы Сігона, цара Эсэвонскага.

 

і панаваў у гарах Гермону, і ў Сальсе, а таксама над усім Башанам аж да мяжы з Гешурам і Маахай, і над паловай Гілеаду, аж да мяжы Сыгона, валадара Хешбону.

Майсей, раб Гасподні, і сыны Ізраілевыя забілі іх; і даў яе Майсей, раб Гасподні, у спадчыну племю Рувімаваму, і Гадаваму і палавіне племя Манасіінага.

 

Майсей, слуга ГОСПАДА, і сыны Ізраіля забілі іх. І аддаў зямлю іхнюю Майсей на пасяленьне [сынам] Рубэна і Гада, і палове калена Манасы.

І вось цары зямлі, якіх пабіў Ісус і сыны Ізраілевыя па гэты бок Ярдана на захад, ад Ваал-Гада ў даліне Ліванскай да Халака, гары, што прасьціраецца да Сэіра, якую аддаў Ісус плямёнам Ізраілевым у спадчыну, пасьля падзелу іх,

 

А вось валадары зямлі, якіх забіў Егошуа і сыны Ізраіля за Ярданам на захад, ад Баал-Гаду ў даліне Лібану аж да гары Халак, якая падымаецца да Сэіру, якую аддаў Егошуа на ўласнасьць каленам Ізраіля, адпаведна да іх падзелу,

на гары, на нізінных мясьцінах, на раўніне, на мясьцінах каля гор, і ў пустыні і на поўдні, Хэтэяў, Амарэяў, Хананэяў, Фэрэзэяў, Эвэяў і Евусэяў:

 

на гары і ў Шэфэлі, у Арабе і на схілах гары, у стэпе і ў Нэгеве, зямлю Хетаў, Амарэйцаў, Хананейцаў, Пэрэзэяў, Хівеяў і Евусэяў:

адзін цар Ерыхона, адзін цар Гая, што каля Вэтыля,

 

валадар Ерыхону — адзін, валадар Гаю, што побач Бэтэлю — адзін;

адзін цар Ерусаліма, адзін цар Хэўрона,

 

валадар Ерусаліму — адзін, валадар Хеўрону — адзін,

адзін цар Ярмута, адзін цар Лахіса,

 

валадар Ярмуту — адзін, валадар Ляхішу — адзін,

адзін цар Эглона, адзін цар Газэра,

 

валадар Эглёну — адзін, валадар Гезэру — адзін,

адзін цар Давіра, адзін цар Гадэра,

 

валадар Дэбіру — адзін, валадар Гедэру — адзін,

адзін цар Хормы, адзін цар Арада,

 

валадар Хармы — адзін, валадар Араду — адзін,

адзін цар Ліўны, адзін цар Адалама,

 

валадар Лібны — адзін, валадар Адуляму — адзін,

адзін цар Македа, адзін цар Вэтыля,

 

валадар Македы — адзін, валадар Бэтэлю — адзін,

адзін цар Тапуаха, адзін цар Хэфэра,

 

валадар Тапуаху — адзін, валадар Хэфэру — адзін,

адзін цар Афэка, адзін цар Шарона,

 

валадар Афэку — адзін, валадар Лашарону — адзін,

адзін цар Мадона, адзін цар Асора,

 

валадар Мадону — адзін, валадар Хацору — адзін,

адзін цар Шымрон-Мэрона, адзін цар Ахсафа,

 

валадар Шымрону — адзін, валадар Ахшафу — адзін,

адзін цар Таанаха, адзін цар Мэгідона,

 

валадар Таанаху — адзін, валадар Мэгіддо — адзін,

адзін цар Кедэса, адзін цар Ёкнэама каля Кармілы,

 

валадар Кадэшу — адзін, валадар Ёкнэаму, што каля Кармэлю — адзін,

адзін цар Дора каля Нафат-Дора, адзін цар Гаіма ў Галгале,

 

валадар Дору з узвышшаў Дор — адзін, валадар паганаў з Гільгалу — адзін,

адзін цар Тырцы. Усіх цароў трыццаць адзін.

 

валадар Тырцы — адзін; усіх валадароў — трыццаць адзін.