Выслоўяў Саламонавых 8 разьдзел
Кніга выслоўяў Саламонавых
Пераклад Васіля Сёмухі → Пераклад Леаніда Галяка
Ці мудрасьць не заклікае? і ці розум ня ўзносіць свой голас?
Ці-ж ня мудрасьць кліча і ці ня розум узвышае свой голас?
Яна стаіць на ўзвышаных месцах, пры дарозе, на ростанях;
Яна становіцца на высокіх месцах пры дарозе і на раздарожжы;
яна кліча каля гарадское брамы, дзе ўваходзяць у дзьверы:
яна кліча каля брамаў пры ўваходзе ў горад, пры ўваходзе ў дзьверы.
«Да вас, людзі, даклікаюся я, і да сыноў чалавечых мой голас!
Да вас клічу я людзі і да сыноў чалавечых мой голас.
Навучэцеся, невукі, добрай разумнасьці, зразумейце вы розум, бязглуздыя.
Навучыцеся неразумныя развагі, а дурныя розуму.
Слухайце, таму што я буду казаць важнае, і выслоўе вуснаў маіх — праўда;
Слухайце, бо буду гаварыць аб вялікіх рэчах і адчыненьне вуснаў маіх — праўда,
Бо ісьціну вымавіць язык мой, а бязбожнасьць — гідота для вуснаў маіх;
бо праўду гаворыць мой язык і бязбожнасьць агідная маім вуснам;
усе словы вуснаў маіх слушныя; няма ў іх хітрыны і ашуканства;
усе словы маіх вуснаў справядлівыя; няма ў іх няпраўды і хітрасьці.
усе яны простыя разумнаму і справядлівыя тым, хто здабыў веды.
Усе яны ясныя разумнаму і справядлівыя для набываючых веду.
Прымеце навуку маю, а ня срэбра; лепей веды, чым чыстае золата;
Прымеце маю навуку, а не серабро; лепш веда, чым адборнае золата,
бо мудрасьць лепшая за перлы, і ўсё, чаго пажадаеш, не дараўнаецца зь ёю.
бо мудрасьць лепшая ад пэрлаў і нішто з пажаданага не зраўняецца з ёю.
Я, мудрасьць, жыву з розумам, і шукаю спазнаньня ў разважлівага.
Я, мудрасьць, жыву з розумам і шукаю разумнай веды.
Страх Гасподні — ненавідзець зло; гонар і пыху і ліхія шляхі і падступныя вусны я ненавіджу.
Страх Госпада гэта ненавісьць да благога; я ненавіджу гордасьць, высокадумнасьць, благі шлях і хітрыя вусны.
У мяне рада і праўда: я розум, у мяне сіла.
У мяне рада і праўдзівая мудрасьць; я розум — у мяне сіла.
Мною цары валадараць, і праўнікі ўзаконьваюць праўду.
Праз мяне пануюць каралі і валадары ўзаканяюць праўду;
Мною кіруюць уладыкі і вяльможы, і ўсе судзьдзі праведныя.
праз мяне пануюць валадары і магнаты і ўсе судзьдзі зямлі.
Хто любіць мяне, тых я люблю, і хто шукае мяне, знойдуць мяне;
Любячых мяне я люблю і шукаючыя мяне знойдуць мяне;
багацьце і слава са мною — скарб нятленны, і праўда;
у мяне багацьце і слава, трывалая маемасьць і праўда;
плады мае лепшыя за золата, і золата самага чыстага, і карысьці ад мяне болей, чым ад чыстага срэбра.
плады мае лепшыя за золата, за найлепшае золата, і карысьці ад мяне больш, чым ад адборнага серабра.
Я хаджу дарогаю праўды, сьцежкамі правасудзьдзя,
Я хаджу па шляху праўды, па сьцежках суду,
каб даць тым, хто мяне любіць, спадчыну дабра, і скарбніцы іхнія я напаўняю.
каб тым, што любяць мяне, дала ў спадчыне вечную маемасьць і напаўняю іх скарбніцы.
Гасподзь меў мяне ад пачатку дарогі Сваёй, раней дзеяў Сваіх, спрадвеку:
Гаспод меў мяне на пачатку Свайго шляху, раней усіх часоў;
адвеку была я памазаная, ад пачатку, ад правеку зямлі.
ад веку я памазаная, ад пачатку, раней існаваньня зямлі.
Я нарадзілася, калі ня было яшчэ бездані, калі яшчэ ня было крыніц, багатых вадою.
Я радзілася раней, чым былі ўстаноўленыя пропасьці, калі ня было яшчэ крыніцаў з вадою.
Я нарадзілася перш, чым былі пастаўлены горы, раней за пагоркі,
Я радзілася раней, чым былі створаныя горы, раней узгоркаў;
калі яшчэ Ён не стварыў ні зямлі, ні палёў, ні пачатковых пылінак сусьвету.
калі Ён не стварыў яшчэ ні зямлі, ні палёў, ні пачаткаў земскага пылу.
Ён рыхтаваў нябёсы, я была там. Калі ён крэсьліў скляпеньне над паверхняю бездані,
Калі Ён прыгатаўляў нябёсы я была там; калі Ён разьмерываў кола на твары бяздоньня;
калі сталяваў наверсе аблокі, калі мацаваў крыніцы бездані,
калі ўмацаваў на гары хмары, калі ўмацаваў крыніцы бяздоньня;
калі даваў мору статут, каб воды не заступалі межаў яго, калі закладваў асновы зямлі:
калі даваў мору ягоныя граніцы і водам, каб не пераступалі ягоных загадаў, калі ўстанаўляў падставы зямлі,
тады я была пры Ім за майстра, і была кожны дзень радасьцю, весялосьцю была перад абліччам Ягоным заўсёды,
тады я была пры Ім мастаком і была радасьцяй Яго, вяселячыся перад Ягоным абліччам увесь час,
радуючыся на зямным коле Яго, і радасьць мая была з сынамі чалавечымі.
радуючыся на зямным кругу Яго і радасьць мая была з сынамі чалавечымі.
Цяпер, дзеці, паслухайце мяне; і шчасныя тыя, што будуць ахоўваць шляхі мае!
Дык слухайце мяне цяпер сыны, бо шчасьлівыя тыя, якія заховываюць шляхі мае.
Паслухайце настаўленьня, і мудрымі станьце, і не адступайцеся ад яго.
Паслухайце павучэньня і будзьце мудрымі і не адступайце.
Шчасны той чалавек, які слухае мяне, чуваючы дзень у дзень каля варотаў маіх і вартуючы дзьверы мае!
Шчасьлівы чалавек, які слухае мяне, які ня сьпіць кожны дзень каля брамаў маіх і стоячы на варце ў маіх дзьвярэй,
Бо, хто знайшоў мяне, той знайшоў жыцьцё, і атрымае мілату ад Госпада;
бо хто знайшоў мяне, той знайшоў жыцьцё і атрымае ласку ад Госпада,
а хто грэшыць супроць мяне, учыняе шкоду душы маёй: усе тыя, што ненавідзяць мяне, любяць сьмерць».
але хто грэшыць супроць мяне, робіць шкоду сваёй душы: усе, што мяне ненавідзяць — любяць сьмерць.
