Выслоўяў Саламонавых 22 разьдзел
Кніга выслоўяў Саламонавых
Пераклад Чарняўскага 2017 → Пераклад Антонія Бокуна
Лепш імя добрае, чым вялікае багацце, лепш ласка добрая, чым срэбра і золата.
Лепш [добрае] імя, чым вялікія багацьці, лепш добрая слава, чым срэбра і золата.
Сустракаюцца багаты і бедны: абодвух іх Творца — Госпад.
Багаты і бедны сустракаюцца, Творца іх усіх — ГОСПАД.
Разважлівы бачыць ліха і хаваецца; легкаверныя ідуць туды, і ім чыніцца шкода.
Разумны бачыць зло і хаваецца, а неразумныя ідуць і будуць пакараныя.
Узнагарода пакорлівасці — страх Госпадаў, багацце і слава, і жыццё.
[Нагарода] за пакору і страх перад ГОСПАДАМ — багацьце, і слава, і жыцьцё.
Калючкі і пасткі на дарозе нясталага; а хто вартаўнік душы сваёй — далёка адыходзіць ад іх.
Церні і пасткі на шляху крывадушнага, а хто захоўвае душу сваю, той аддаляецца ад іх.
Настаўляй юнака ў пачатку дарогі яго; нават калі састарэе, ён не сыдзе з яе.
Пастаў юнака на слушны шлях, і ён ня збочыць з яго, нават калі састарэе.
Багаты распараджаецца беднымі; а хто прымае пазычанае — раб таго, хто пазычае.
Багаты пануе над бедным, і чалавек, які ўзяў пазыку, — слуга паверніка.
Хто сее несправядлівасць, той збярэ ліха, і розга гневу яго скончыцца.
Хто сее беззаконьне, той будзе жаць ліха, і кій гневу ягонага будзе зьнішчаны.
Будзе дабраславёны той, хто мае добрае вока, бо з хлеба свайго дае беднаму.
Хто мае добрае вока, той будзе дабраслаўлёны, бо з хлеба свайго дае ўбогаму.
Прагані насмешніка — і знікне разам з ім сварка; спыняцца спрэчкі і ганьба.
Выгані насьмешніка, і адыйдзе звадка, і суцішацца спрэчкі і абразы.
Хто любіць чысціню сэрца, той будзе мець сябрам цара з-за ласкі вуснаў сваіх.
Хто любіць чыстасьць сэрца, у таго ласка на вуснах яго, і валадар з ім сябруе.
Вочы Госпадавы берагуць веды, а словы несправядлівага скідваюць.
Вочы ГОСПАДА захоўваюць веданьне, Ён касуе словы ліхадзея.
Гультай кажа: «Леў знадворку, прападу я на сярэдзіне вуліцы».
Гультай кажа: «Леў на двары, пасярод плошчы я буду забіты».
Глыбокая яма — вусны жонкі чужой; на каго загневаецца Госпад, той упадзе ў іх.
Вусны чужаніцы — глыбокая яма; на каго загневаўся ГОСПАД, той уваліцца туды.
У сэрцы юнака змяшчаецца бязглуздасць, і розга настаўлення прагоніць яе.
Дурасьць прывязаная да сэрца юнака, але дубец настаўленьня выганіць яе.
Ты прыгнятаеш беднага? Сам ён павялічыць сваё багацце. Ты дарыш багацейшаму? Сам збяднееш.
Хто ўціскае ўбогага, каб памножыць сваё, і дае багатаму, той згалее.
Нахілі вуха сваё і слухай словы мудрых; а сэрца сваё прыкладзі да маіх ведаў,
Прыхілі вуха тваё, і слухай словы мудрых, і сэрца тваё зьвярні да ведаў маіх,
бо будуць яны вельмі прыгожыя, калі зберажэш іх у чэраве тваім, і разальюцца яны на вуснах тваіх.
бо цудоўна будзе, калі захаваеш іх у нутры тваім, і будуць яны таксама на вуснах тваіх,
Каб была ў Госпадзе надзея твая, я гавару табе сёння аб гэтым.
каб пэўнасьць твая была ў ГОСПАДЗЕ, я вучу цябе сёньня.
Ці не апісваў я табе гэта заўчора ў намерах і ведах,
Ці ж не пісаў я табе тройчы парады і навучаньні,
каб паказаць табе трываласць слоў праўды, каб адказаў ты таму, хто паслаў цябе?
каб паведаміць табе дакладныя словы праўды, каб ты мог перадаць словы праўды тым, што паслалі цябе?
Не чыні гвалту беднаму, таму што ён бедны, і не зневажай таго, хто жыве ў галечы,
Не абдзірай убогага, таму што ён убогі, і не ўціскай прыгнечанага каля брамы,
бо Госпад будзе разбіраць справу іх і пазбавіць Ён жыцця рабаўнікоў.
бо ГОСПАД будзе бараніць у справе іхняй і адбярэ душу ў тых, якія іх абіраюць.
Не будзь сябрам чалавеку гняўліваму і не хадзі з чалавекам нястрыманым,
Не сябруй з васпанам гняўлівым і з чалавекам нястрыманым не хадзі,
каб выпадкова не навучыцца сцежкам яго і не атрымаць спакусы для душы сваёй.
каб ты не навучыўся сьцежкам яго і не нацягнуў пятлі на душу тваю.
Не будзь з тымі, што даюць сваю заруку і што прапануюць сябе паручыцелямі за даўгі.
Ня будзь з тых, што даюць руку, што заручаюцца за даўгі.
Бо калі не маеш адкуль пакрываць [доўг], то ў чым прычына таго, каб узялі ложак твой з-пад цябе?
Калі ня маеш, чым заплаціць, навошта маюць забраць з-пад цябе ложак твой?
Не перанось межы старадаўнія, якія вызначылі бацькі твае.
Не перасоўвай мяжы старадаўняй, якую вызначылі бацькі твае.
Бачыш чалавека, руплівага ў сваёй справе: будзе ён стаяць перад царамі, а не перад людзьмі простымі.
Ці бачыў ты чалавека, спраўнага ў занятку сваім? Перад абліччам валадароў ён будзе стаяць, ня будзе ён стаяць перад прасьцякамі.
