Псалтыр 34 псалом
Псалтыр
Пераклад Яна Станкевіча → Пераклад Антонія Бокуна
Давідава, як ён адмяніў свой паступак перед Авімелехам, і гэты выгнаў яго, і ён пашоў.
Буду дабраславіць СПАДАРА ў кажным часе; штачасна хвала Яго ў вуснах маіх.
СПАДАРОМ хваліцца душа мая; хай чуюць лагодныя й вяселяцца.
Узьвялічайце СПАДАРА з імною, узвышайма імя Ягонае разам.
Я шукаў СПАДАРА, і Ён адказаў імне, і ад усіх страхаў маіх выбавіў мяне.
Углядаліся ў Яго й сьвятлелі, віды іхныя не засароміліся.
Гэты ўбогі пагукаў, і СПАДАР пачуў, і выбавіў яго ад усіх немарасьцяў ягоных.
Як на вайне, кладзецца Ангіл СПАДАРОЎ навокал тых, што баяцца Яго, і выбаўляе іх.
Спрабуйце а абачча, што добры СПАДАР! Шчасьлівая людзіна, што спадзяецца на Яго.
Бойцеся СПАДАРА, сьвятыя Ягоныя, бо няма нястачы тым, што баяцца Яго,
Левяняты дазнаюць нястачы а голаду, але шукаючым СПАДАРА ня будзе не ставаць ніякага дабра.
Пайдзіце, сынове, паслухайце мяне, боязьні СПАДАРА буду ўчыць вас.
Каторы муж жадае жыцьця й любе дні, каб бачыць дабро,
Узьдзержуй язык свой ад благога і вусны свае ад гуканьня ашукі;
Адхініся ад благога й рабі дабро; шукай супакою й жаніся за ім.
Вочы СПАДАРОВЫ на справядлівых, і вушы Ягоныя на гуканьне іхнае.
Від СПАДАРОЎ супроці ліхадзеяў, каб выгубіць ізь зямлі памятку іх.
Галасілі, і СПАДАР чуў, і ад усіх бедаў іхных вывальніў іх.
СПАДАР блізка да патрышчаных сэрцам і прыбітых духам выбаўляе.
Шмат бяды ў справядлівага, але з усіх іх вывальняе яго СПАДАР.
Ён сьцеражэць усі косьці ягоныя, ні водная зь іх ня зломіцца.
Заб’ець нягоднага ліха, і ненавідзячыя справядлівага будуць вінны.
Выкупляе СПАДАР душу слугаў Сваіх, і ня будуць вінны ўсі, што спадзяюцца на Яго.
