Ёва 40 разьдзел

Кніга Ёва
Пераклад Антонія Бокуна → Пераклад Чарняўскага 2017

 
 

І адказаў ГОСПАД Ёву з віхуры, і сказаў:
 
І адказваючы, Госпад з віхуры сказаў Ёву:

«Падперажы, як мужчына, сьцёгны твае. Я буду пытацца ў цябе, а ты тлумач Мне.
 
«Як мужчына, падпаяшы сцёгны свае. Я буду ў цябе пытацца, а ты тлумач Мне.

Ці хочаш ты зьнішчыць суд Мой? Ці ты асудзіш Мяне, каб сябе апраўдаць?
 
Ці хочаш ты абвергнуць суд Мой і асудзіш Мяне, каб сябе апраўдаць?

Калі ты маеш рамяно, як Бог, і калі ты падобным голасам грыміш, як Ён,
 
І ці ты маеш плячо, як Бог, і калі ты падобным голасам грыміш, як Ён,

тады апраніся ў маестат і велічнасьць, і адзенься ў годнасьць і красу.
 
атачы сябе прыгажосцю і веліччу і адзенься ў славу і прыгажосць.

Зьяві ярасьць гневу твайго, і паглядзі на ўсіх пыхліўцаў, і ўпакор іх.
 
Пралі абурэнне гневу Свайго і, паглядзеўшы на кожнага ганарлівага, упакор [яго].

Глянь на ўсіх пыхліўцаў, і асаром іх, і выгубі бязбожных на месцах іхніх.
 
Глянь на ўсіх пыхліўцаў, і асаром іх, і выгубі бязбожных на іх месцах.

Пахавай іх разам у пыле, і абліччы іхнія закрый цемраю.
 
Схавай іх разам у пыле і твары іх закрый цемраю.

І Я таксама буду славіць цябе, калі правіца твая дапаможа табе.
 
Тады Я прызнаю, што правая рука твая можа збавіць цябе.

Вось, бегемот, якога Я стварыў, як і цябе, і есьць ён траву як вол.
 
Вось бегемот, якога Я стварыў разам з табою; і есць ён сена, як вол.

Вось, сіла ягоная — у сьцёгнах ягоных, і моц ягоная — у цягліцах жывата ягонага.
 
Сіла яго ў сцёгнах яго, а дужасць яго ў пупку жывата яго.

Ён круціць хвастом сваім, як кедрам, жылы сьцёгнаў ягоных моцна сплецены.
 
Круціць хвастом сваім, як кедрам, жылы сцёгнаў яго моцна сплецены.

Косткі ягоныя — як трубы мядзяныя, і ногі ягоныя — як пруты жалезныя.
 
Косці яго — як медныя трубы, і храшчы яго — як пруты жалезныя.

Ён ёсьць пачаткам шляхоў Божых. Толькі Той, Хто стварыў яго, можа паднесьці да яго меч.
 
Ён ёсць пачаткам шляхоў Божых. Той, Хто стварыў яго, можа паднесці да яго меч.

Горы прыносяць ежу яму, і ўсе зьвяры палявыя гуляюць там.
 
Горы прыносяць яму ежу, усе звяры дзікія там гуляюць.

Ён сьпіць пад ценем лотасу, схаваўшыся ў трысьнягу і дрыгве.
 
Ён спіць у рошчах лотасу, у сховах трыснягу і ў балоцістых мясцінах.

Лотасы хаваюць яго ў ценю сваім, атачаюць яго вербы пры ручаі.
 
Рошчы лотасаў распасціраюць над ім цень, атачаюць яго вербы пры ручаю.

Калі рака ўздымаецца, ён не баіцца, ён бясьпечны, хоць Ярдан даходзіць да пашчы ягонай.
 
Калі рака ўздымаецца, ён не баіцца; ён бяспечны, нават калі вада даходзіць да пашчы.

Ці можа хто ўзяць яго на вачах ягоных? Ці можаш пракалоць яму ноздры гакам?
 
Хто можа захапіць яго на вачах яго ці пракалоць яму ноздры калом?

Ці можаш ты Левіятана выцягнуць кручком і вяроўкаю схапіць яго за язык?
 
Ці зможаш ты Левіятана выцягнуць кручком і вяроўкаю ці схопіш яго за язык?

Ці ўложыш ты трысьціну ў ноздры ягоныя або ці праколеш пашчэнку ягоную цярнінай?
 
Ці ўкладзеш ты трысціну ў яго ноздры або ці праколеш сківіцу яго цярнінаю?

Ці будзе ён дужа прасіць цябе або гаварыць да цябе лагодна?
 
Ці будзе ён дужа прасіць цябе або гаварыць да цябе ласкава?

Ці заключыць ён з табою запавет, і ты возьмеш яго як слугу навечна?
 
Ці заключыць ён з табою запавет і ты возьмеш яго на вечную службу?

Ці пагуляеш ты з ім, як з птушкаю, або прывяжаш яго для дачок сваіх?
 
Ці пагуляеш ты з ім, як з птушкаю, або прывяжаш яго для сваіх дачок?

Ці ты справіш над ім частаваньне супольнае, і ці падзеляць яго між купцамі?
 
Ці загледзяцца на яго сябры, ці падзеляць яго купцы?

Ці зможаш прабіць скуру ягоную дзідаю, а галаву ягоную — восьцямі рыбацкімі?
 
Ці праб’еш ты скуру яго стрэламі, а галаву яго — рыбацкай астрогаю?

Палажы на яго руку тваю, і рыхтуйся да бою, бо болей [гэтага] ня зробіш.
 
Пакладзі на яго сваю руку, і памятай пра бітву: і больш не будзеш.