Ёва 36 разьдзел

Кніга Ёва
Пераклад Антонія Бокуна → Пераклад Чарняўскага 2017

 
 

І працягваў Элігу, і сказаў:
 
І ў дадатак Элію вось што сказаў:

«Пачакай мяне трохі, і я пакажу табе, што маю яшчэ словы пра Бога.
 
«Пачакай мяне хвілінку, і я пакажу табе: бо я маю яшчэ нешта сказаць пра Бога.

Пачну здалёк навучаньне маё, і Творцу майму аддам праведнасьць.
 
Паўтару навуку маю здалёк і Творцу майму аддам справядлівасць.

Бо праўдзівыя і без падману словы мае, і з табою я дасканалы ў веданьні.
 
Бо праўдзівыя і без падману словы мае, і перад табой [я] дасканалы ў веданні.

Вось, Бог магутны і не адкідае нікога, Ён магутны моцай сэрца.
 
Не дасць Бог магутны і не адкідае Магутны моцаю сэрца,

Ён не дае жыць бязбожніку, але дае суд убогаму.
 
не дасць Ён жыць бязбожніку, але чыніць суд для бедных.

Не адварочвае Ён ад праведных вачэй Сваіх, але саджае іх з валадарамі на пасадзе назаўжды, і яны ўзвышаюцца.
 
Не адверне Ён ад справядлівага вачэй сваіх і цароў на пасадзе размяшчае на векі, і яны ўзвышаюцца.

І калі яны закаваныя ў кайданы і зьвязаныя путамі гора,
 
І, калі яны будуць закаваныя ў кайданы і звязаныя путамі бядоты,

Ён паказвае ім учынкі іхнія і злачынствы іхнія, што яны памножыліся.
 
Ён пакажа ім справы іх і злачынствы іх, што яны былі гвалтоўныя.

І Ён адкрывае вуха іхняе, каб навучыць іх, і гаворыць ім, каб адвярнуліся ад ліхоты.
 
І адкрые Ён вуха іх, каб навучыць іх з дакорам, і будзе гаварыць ім, каб адвярнуліся ад злачыннасці.

Калі паслухаюцца і будуць служыць Яму, яны пражывуць дні свае ў дабрабыце і гады свае — у прыемнасьці.
 
Калі паслухаюцца і будуць шанаваць Яго, то пражывуць свае дні ў дабрабыце і свае гады ў шчасці.

А калі не паслухаюцца, тады загінуць ад дзіды і памруць з нястачы веданьня.
 
А калі не паслухаюцца, то пройдуць праз раку смерці і загінуць у безразважнасці.

Крывадушнікі складаюць гнеў у сэрцы сваім і ня клічуць [Бога], калі Ён закоўвае іх [у кайданы].
 
А бязбожнікі складаць будуць гнеў Божы ў сваім сэрцы і не прызавуць Яго, калі будуць скаваныя.

У марнасьці памірае душа іхняя і жыцьцё іхняе між распусьнікамі.
 
Памрэ ў маладосці дух іх, і жыццё іх — у юнацтве.

Ён ратуе ўбогага з уціску ягонага і адкрывае вуха ягонае ў трывозе.
 
Ён уратуе беднага ад нястачы яго і адкрые вуха ў бядзе яго.

Таксама цябе Ён выбавіць з цясноты на прастору, дзе няма ўціску, і будзе поўнае тлушчу ўсё на стале тваім.
 
Дык выбавіць Ён цябе з уціску, і будзе прастора, а не цяснота перад табою, і будзе поўнае тлушчу ўсё на стале тваім.

Але ты поўны меркаваньняў бязбожных, і чакаюць цябе суд і вырак.
 
Справа твая асуджана, быццам бязбожніка; яны атрымаюць суд і справядлівасць.

Няхай не зьвядзе цябе гнеў, і вялікі выкуп няхай ня скрывіць [шляхоў] тваіх.
 
Сцеражыся, каб не звяло цябе багацце і мноства дароў не скрывіла цябе.

Ці ў няшчасьці крык твой дапаможа або намаганьні сілы тваёй?
 
Ці будзеш ты крычаць і выкарыстоўваць усе намаганні сілы тваёй, пакуль ты не ў цясноце?

Не жадай тае ночы, калі народы паднімаюцца з месцаў сваіх.
 
Не чакай прагна той ночы, каб узняўся натоўп дзеля іх.

Сьцеражыся, каб не зьвярнуўся да злачынства, бо праз яго ты спазнаеш гора.
 
Сцеражыся, каб не звярнуўся да злачынства, бо праз яго спазнаеш ты гора.

Вось, Бог узьвялічаны ў моцы Сваёй. Які настаўнік падобны да Яго?
 
Вось жа, Бог высокі ў моцы Сваёй, які настаўнік падобны да Яго?

Хто можа вызначыць шляхі Ягоныя? І хто можа сказаць Яму: “Ты ўчыніў зло”?
 
Хто зможа прасачыць дарогі Яго, або хто можа Яму сказаць: “Ты ўчыніў несправядлівасць”?

Памятай, каб услаўляць учынкі Ягоныя, пра якія сьпяваюць людзі.
 
Памятай, каб услаўляць справу Яго, пра якую спяваюць мужы.

Усе людзі бачаць гэта, кожны прыглядаецца здалёк.
 
Усе людзі бачаць Яго, кожны прыглядаецца здалёк.

Вось, Бог вялікі і перавышае веданьне нашае; лік гадоў Ягоных — неаблічальны.
 
Вось жа, Бог вялікі і пераўзыходзіць веданне наша; лік гадоў Яго невызначальны.

Ён зьбірае кроплі вады, і падаюць яны дажджом з хмары Ягонай.
 
Ён збірае кроплі дажджу і вылівае ліўні ракою,

Яны цякуць з хмараў і выліваюцца на многіх людзей.
 
іх праліваюць хмары, скропліваючы многіх людзей.

Хто можа разумець разьлегласьць аблокаў і грымоты намёту Ягонага?
 
Хто, сапраўды, можа зразумець разлегласць хмар, грымоты палаткі Яго?

Вось, Ён расьцягнуў вакол Сябе сьвятло Сваё і закрывае глыбіні мора.
 
Вось, Ён расцягнуў вакол Сябе маланкі Свае і накрыў глыбіні мора.

Адтуль Ён судзіць народы, і шчодра корміць іх.
 
Праз іх Ён судзіць народы і шчодра корміць іх.

У руках Сваіх Ён трымае маланку і загадвае ёй, куды цэліць.
 
У руках сваіх Ён трымае маланку і загадвае ёй, каб біла.

Грукат ейны паведамляе пра яе, нават статкі адчуваюць прыход яе.
 
Грукат яе паведамляе аб ёй, палаючы гневам супраць злачыннасці.