Ёва 33 разьдзел

Кніга Ёва
Пераклад Антонія Бокуна → Пераклад Чарняўскага 2017

 
 

Дык выслухай, Ёве, прамову маю і прыхілі вуха на ўсе словы мае.
 
Дык пачуй, Ёве, прамову маю і выслухай усе словы мае.

Вось, я адкрываю вусны свае, і язык мой гаворыць у вуснах маіх.
 
Вось, я адкрыў вусны свае, і язык мой гаворыць у горле маім.

Ад шчырага сэрца плывуць словы мае, і яснае веданьне кажуць вусны мае.
 
Ад шчырага сэрца мае словы, і чыстую праўду кажуць вусны мае.

Дух Божы ўчыніў мяне, і дыханьне Усемагутнага ажывіла мяне.
 
Дух Божы ўчыніў мяне, і подых Усемагутнага ажывіў мяне.

Падрыхтуйся і стань перад абліччам маім, і прадстаў справу тваю.
 
Калі можаш, адкажы мне, падрыхтуйся перада мною і падыміся.

Вось, я, як вусны твае перад Богам, таксама я з гліны ўфармаваны.
 
Вось жа, я, як і ты, перад Богам, ды з таго ж самага бруду аддзелены і я.

Вось страх [перада] мною няхай цябе не палохае, і рука мая няхай ня будзе цяжкаю над табою.
 
Так што страх, які я наганяю, хай цябе не палохае, і цяжар мой хай не будзе цяжкі для цябе.

Тое, што ты гаварыў — у вушах маіх, і я чуў голас словаў тваіх:
 
Тое, што ты сказаў, было ў вушах маіх, і голас слоў тваіх пачуў я:

“Чысты я, бяз грэху, беззаганны, і няма віны ў-ва мне.
 
“Чысты я, без граху, беззаганны; і няма правіннасці ўва мне.

Але [Бог] знайшоў абвінавачваньне супраць мяне, і лічыць мяне ворагам Сваім.
 
Паколькі ж Ён знайшоў падставы для скаргаў на мяне, то лічыць мяне Сваім ворагам;

Ён закаваў у кайданы ногі мае, пільнуе ўсе сьцежкі мае”.
 
ногі мае закаваў у кайданы, пільнуе ўсе шляхі мае”.

Вось, у гэтым ты няправедны. Я адкажу табе, бо Бог большы за чалавека.
 
Вось, ты ў гэтым несправядлівы, адкажу табе, бо Бог большы за чалавека.

Чаму ты спрачаешся з Ім, што Ён не адказвае табе ніводнага слова?
 
Чаму ты спрачаешся з Ім, што Ён не адказвае табе на ўсе словы?

Бог прамаўляе і адзін раз, і другі, а [чалавек] не зважае на гэта.
 
Раз кажа Бог і другі раз таго самага не паўтарае.

У сьне і ў відзежы начным, калі моцны сон агартае людзей і ў дрымоце на ложку,
 
Праз сон і ў бачанні начным, калі агортвае сон людзей і калі дрэмлюць яны на ложку,

адкрывае Ён вуха людзям, і палохае іх у зьявах,
 
тады адкрывае Ён вушы людзям і ўкладвае Сваё настаўленне,

каб адвярнуць чалавека ад учынкаў [ліхіх], і вызваліць яго ад пыхлівасьці,
 
каб адвярнуць чалавека ад таго, што ён чыніць, і вызваліць яго ад пыхлівасці,

каб захаваць душу ягоную ад магілы, і жыцьцё ягонае, каб не загінула ад дзіды.
 
вырываючы душу яго ад магілы і жыццё яго, каб не трапіў ён у яму смерці.

Ён дакарае яго хваробаю на ложку ягоным і болем безупынным у костках ягоных.
 
Дакарае яго таксама хваробаю на ложку яго, або болем безупынным у касцях яго.

І жыцьцё ягонае брыдзіцца хлебам, і душа ягоная — страваю найлепшаю.
 
І хлеб агідным становіцца яму ў жыцці яго, і раней прыемная страва — душы яго.

Цела яго зьнікае на вачах, і косткі, звычайна ня бачныя, адкрываюцца.
 
Цела яго высыхае на вачах, і косці, якіх не было відаць, адкрываюцца.

Набліжаецца душа ягоная да магілы, і жыцьцё ягонае — да памёршых.
 
Набліжаецца Ён да знішчэння ў магіле, і жыццё яго — да сядзібы памерлых.

Калі пры ім анёл-абаронца, адзін з тысячы, які распавядзе чалавеку, у чым праведнасьць ягоная,
 
Калі будзе ў яго анёл-звястун, адзін з тысячы, каб абвясціць чалавеку справядлівасць,

тады зьлітуецца [Бог] над ім і скажа: “Выратуй яго, каб не ішоў ён у магілу, бо Я знайшоў выкуп [за яго]”.
 
то злітуецца Бог над ім і скажа: “Вызвалі яго, каб не ішоў ён у магілу, бо Я знайшоў тое, у чым яму можа быць літасць”.

Тады цела ягонае стане, як у маладосьці, і вернецца ён у дні юнацтва свайго.
 
Расквітнее цела яго лепш, чым у маладосці, і вернецца ён у дні юнацтва свайго.

Ён будзе маліць Бога, і [Бог] будзе спагадны яму, і ўбачыць аблічча ягонае радасным, і верне чалавеку праведнасьць ягоную.
 
Ён будзе маліць Бога, і Бог будзе спагадны да яго, і ўбачыць твар яго радасным, і верне чалавеку яго справядлівасць.

І ён паглядзіць на людзей і скажа: “Я грашыў і чыніў няправасьць, і не аднагароджана мне.
 
Спявае ён людзям і кажа: “Я зграшыў і парушыў справядлівасць, але я не адплачана мне.

Ён выкупіў душу маю, каб не трапіла ў магілу, і будзе бачыць сьвятло жыцьцё маё”.
 
Ён вызваліў душу маю, каб не трапіла ў магілу, але, жывучы, бачыла святло”.

Вось, усё гэта робіць Бог два, і тры разы з чалавекам,
 
Вось, усё гэта робіць Бог два і тры разы з чалавекам,

каб адвесьці душу ягоную ад магілы, і прасьвятліць яго сьвятлом жывых.
 
каб адвесці душы іх ад магілы і прасвятліць святлом жывых.

Уважай, Ёве, паслухай мяне, і памаўчы, і я прамоўлю.
 
Зважай, Ёве, і паслухай мяне, і памаўчы, пакуль я гавару.

Калі маеш словы, адкажы мне. Прамоў, бо хачу, каб ты аказаўся праведным.
 
Калі ж маеш, што сказаць, адкажы мне, гавары, бо хачу, каб ты аказаўся справядлівым.

Калі ж ня маеш, паслухай мяне. Маўчы, і я навучу цябе мудрасьці».
 
Калі ж не маеш, то паслухай мяне; маўчы, і я навучу цябе мудрасці».