Ёва 5 разьдзел
Кніга Ёва
Пераклад Антонія Бокуна → Пераклад Чарняўскага 2017
Дык крычы, калі ёсьць той, хто адкажа табе? Да каго са сьвятых ты зьвернешся?
Дык крычы, калі ёсць той, хто табе адкажа! Да каго са святых звернешся ты?
Бо неразумнага забівае гняўлівасьць, а дурнога губіць зайздрасьць.
Бо бязглуздага забівае гняўлівасць, а неразумнага губіць зайздрасць.
Я бачыў, як дурны разжываецца, але ў момант спарахнеў дом ягоны.
Я бачыў бязглуздага, трывала ўкаранёнага, і пракляў я дом яго ў той жа час.
Сыны ягоныя без ратунку, іх топчуць у браме, і няма каму ратаваць іх.
Далёка будуць сыны яго ад збаўлення, і будуць іх штурхаць у браме, і не будзе таго, хто б выбавіў.
Ураджай ягоны зьесьць галодны, і з-за агароджы схопіць, і прагны праглыне багацьце ягонае.
Ураджай яго з’есць галодны, а самога яго ўзброены схопіць, і прагныя вып’юць багацце яго.
Ня з пылу бярэцца няшчасьце, і не з зямлі расьце гора.
Бо не з пылу бярэцца няшчасце, і не з зямлі вырастае пакута,
Але чалавек нараджаецца на пакуты, як зьнічкі — каб падымацца ўгору.
але чалавек спараджае працу, як птушкі ўзнімаюцца ў палёт.
Таму я буду прасіць Бога, і да Бога ўзьнясу справу маю.
З гэтай прычыны я буду прасіць Госпада і ўзнясу прамову сваю да Бога,
Ён творыць рэчы недасьледныя і вялікія, і цуды незьлічоныя.
Які чыніць вялікае, і недаследнае, і дзівоснае без ліку;
Ён дае дождж на аблічча зямлі і поіць палеткі вадою.
Які дае дождж на аблічча зямлі і абмывае водамі палеткі;
Ён падымае прыніжаных высока, і тых, што смуткуюць, суцяшае збаўленьнем.
Які пакорлівых ставіць высока, а тужлівых падтрымлівае выратаваннем;
Ён разьбівае намеры ліхотнікаў, каб не змаглі рукі іхнія выканаць тое, што задумалі.
Які разбівае намеры ліхадзеяў, каб не змаглі рукі іх выканаць тое, што пачалі;
Ён ловіць хітрых у глупоце іхняй, і змову крывадушнікаў робіць марнай.
Які ловіць мудрых у хітрасці іх і змову нягоднікаў разбівае.
Удзень падаюць у цемру, і быццам уначы, навобмацак ідуць апоўдні.
Днём яны забягуць у цемру і, быццам уночы, будуць навобмацак ісці апоўдні.
Ён ратуе беднага ад мяча, і бедака — ад рукі нахабніка.
Затое Ён выратуе няшчаснага ад меча вуснаў іх і ад рукі пераследніка — беднага;
І ёсьць надзея для ўбогага, а крыўда зачыняе вусны свае.
і будзе спадзяванне няшчаснаму, несправядлівасць жа закрые рот свой.
Шчасьлівы чалавек, якога дакарае Бог; таму навучаньнем Усемагутнага не пагарджай.
Шчасны чалавек, якога дакарае Бог; дык ушчуваннем Усемагутнага не пагарджай.
Ён раніць, і Ён лечыць, Ён ударае і аздараўляе Сам рукамі Сваімі.
Бо Ён раніць і лечыць, Ён б’е, і рукі Яго аздараўляюць.
Ад шасьці бедаў збавіць цябе, і ў сёмы раз не кране няшчасьце цябе.
Ад шасці бед збавіць цябе, і ў сёмы раз не кране цябе няшчасце.
У голад Ён захавае цябе ад сьмерці, і ў час вайны ад мяча ўратуе.
У голад Ён выбавіць цябе ад смерці, а ў час вайны — ад рукі меча.
Усьцеражэшся ты ад языка кусьлівага і ня будзеш баяцца спусташэньня, калі яно прыйдзе.
Усцеражэшся ты ад бізуна языка і не збаішся спусташэння, калі яно прыйдзе.
У час спусташэньня і голаду будзеш ты сьмяяцца і ня будзеш баяцца зьвяроў палявых.
У час спусташэння і голаду будзеш ты смяяцца ды не будзеш баяцца звяроў зямных.
З камянямі палявымі дамова твая, і зьвяры дзікія будуць прыязныя табе.
Але з камянямі палявымі дамова твая і звяры зямныя будуць да цябе прыязныя.
І ты даведаешся, што намёт твой у супакоі, і, наведваючы жытло тваё, ня знойдзеш нястачы.
І ты даведаешся, што палатка твая ў супакоі, і, наведваючы жытло сваё, не дапусціш памылкі.
І ты ўбачыш, што насеньне тваё шматлікае і нашчадкі твае — быццам трава на зямлі.
І даведаешся таксама, што насенне тваё будзе шматлікае і нашчадкі твае — быццам зелле зямное.
І ўвойдзеш у магілу ў гадах сьпелых, як кладзецца сноп пшаніцы ў час свой.
І ўвойдзеш у магілу ў гадах саспелых, як ставіцца сноп пшаніцы ў час свой.
Як мы дасьледавалі гэта, так і ёсьць. Паслухай гэта, і сам зразумееш».
Вось, як мы даследавалі гэта, так і ёсць; паслухай гэта і сам зразумей для сябе».