Ёва 22 разьдзел

Кніга Ёва
Пераклад Антонія Бокуна → Пераклад Чарняўскага 2017

 
 

І адказаў Эліфаз з Тэману, і сказаў:
 
У адказ Эліфаз Тэманіт сказаў:

«Ці можа чалавек быць карысным Богу? Разумны ледзь самаму сабе можа быць карысным.
 
«Ці можа чалавек быць карысным Богу, калі ён ледзь разумее, як самому сабе быць карысным?

Што за карысьць Усемагутнаму, калі ты праведны, або што Яму дасьць, калі шлях твой беззаганны?
 
Што за карысць Усемагутнаму, калі ты будзеш справядлівы, або што ты даеш Яму, калі б учыніў беззаганнай дарогу тваю?

Ці ж за пабожнасьць тваю Ён карае цябе і ідзе на суд з табою?
 
Ці ж за тваю пабожнасць будзе Ён дакараць цябе і пойдзе на суд з табою?

Ці ж не за ліхоту тваю і незьлічоныя злачынствы твае?
 
Ды ці ж не праз ліхадзейнасць тваю шматлікую і бясконцую несправядлівасць тваю?

Бо ты браў заклад ад братоў тваіх ні за што і з голых зьдзіраў адзеньне.
 
Бо ты ўзяў заклад ад братоў тваіх ні за што і з голых здымаў адзенне.

Ты не даваў вады сасьмягламу, і галоднаму адмаўляўся даваць хлеба.
 
Ты не падаў вады спрацаванаму і галоднаму адмаўляўся даць хлеба.

Моцнаму чалавеку даваў ты зямлю, і заможны пасяляўся на ёй,
 
Хіба заможнаму чалавеку ўспамогаю будзе зямля і, завалодаўшы, ён будзе жыць на ёй?

а ўдоваў адсылаў ты з пустымі рукамі, і сіротаў абцяжарваў работамі.
 
Удоў адпускаў ты з пустымі рукамі, і плечы сірот абцяжарваў.

Дзеля таго акружаны ты пасткамі, і трывожыць цябе страх неспадзяваны,
 
Дзеля таго акружаны ты пасткамі і трывожыць цябе страх неспадзяваны.

і ў цемры ты ня бачыш, і вада вялікая залівае цябе.
 
І ў цемры ты не бачыш, і напор вады прыціскае цябе.

Ці ж Бог не вышэйшы за неба? Паглядзі ўгару на зоркі, як яны высока!
 
Ці ж Бог не вышэйшы за неба? Паглядзі ўгару на зоркі, як яны высока!

А ты кажаш: “Што ведае Бог? Ці праз імглу Ён можа судзіць?
 
А ты кажаш: “Што там ведае Бог? Быццам бы Ён можа судзіць праз імглу.

Хмары — заслона Яму, так што ня бачыць Ён і ходзіць па скляпеньні нябесным”.
 
Хмары — покрыва Яго, і не бачыць Ён нашых спраў, і ходзіць [толькі] па крузе нябесным”.

Ці ты будзеш трымацца сьцежкі старадаўняй, па якой хадзілі злачынцы,
 
Ці ты прагнеш трымацца шляху спрадвечнага, па якім крочылі злачынцы,

якія заўчасна былі зьнішчаныя, бо паводка падмыла падваліны іхнія?
 
якія заўчасна былі знішчаны, і рака падмыла іх грунт?

Яны казалі Богу: “Адыйдзіся ад нас! Што можа зрабіць нам Усемагутны?”
 
Яны казалі Богу: “Адыдзіся ад нас!” і “Што можа зрабіць нам Усемагутны?”

А Ён багацьцем напоўніў дамы іхнія. Але няхай будзе далёкая ад мяне рада бязбожных.
 
Калі Ён багаццем напоўніў дамы іх, іх думкі далёка былі ад Яго.

Праведнікі будуць бачыць гэта і цешыцца, і чалавек нявінны будзе сьмяяцца з іх:
 
Справядлівыя будуць бачыць і цешыцца, і чалавек беззаганны будзе смяяцца з іх:

“Сапраўды вынішчаны супраціўнік наш, а багацьце іхняе спаліў агонь”.
 
“Сапраўды прапала маёмасць іх, а рэшту іх паглынуў агонь”.

Дык пагадзіся з Ім, і мей супакой, і праз гэта прыйдзе да цябе добрае.
 
Дык пагадзіся з Ім, і будзь спакойны, і праз гэта будзеш мець найлепшы плён.

Вазьмі з вуснаў Ягоных закон і палажы словы Ягоныя ў сэрцы тваім.
 
Прымі з вуснаў Яго закон і пакладзі словы Яго ў сэрцы сваім.

Калі навернешся да Усемагутнага, адновішся і адкінеш злачыннасьць ад намёту твайго,
 
Калі навернешся да Усемагутнага, адновішся і адкінеш далёка несправядлівасць ад палаткі сваёй.

калі ацэніш золата як парахно, а [золата] Афіру — як камень з ручая,
 
Прыпадобніш золата да парахна, а камяні Афіра — да рачнога пяску,

тады Усемагутны будзе золатам тваім і бліскучым срэбрам для цябе.
 
Усемагутны будзе тваёй крыніцай каштоўных металаў і накопіцца срэбрам для цябе.

Тады захапляцца ты будзеш Усемагутным і падымеш да Бога аблічча тваё.
 
Тады будзеш мець дастаткова асалод ва Усемагутным і падымеш аблічча сваё да Бога.

Будзеш прасіць Яго, і Ён выслухае цябе, і ты споўніш абяцаньні твае.
 
З пакораю будзеш прасіць Яго, і Ён выслухае цябе, і ты споўніш абяцанні свае.

Што пастановіш, прыйдзе да цябе, і на шляхах тваіх будзе сьвяціць сьвятло.
 
Што пастановіш, прыйдзе да цябе, і на дарогах тваіх будзе свяціць святло.

Бо Ён паніжае таго, хто пыхлівы, а хто схіляе вочы, той будзе збаўлены.
 
Бо Ён паніжае таго, хто гаворыць пыхліва, а хто апускае вочы, той будзе збаўлены.

Ён ратуе [нават] таго, хто не без віны, і будзе ён уратаваны дзеля чыстасьці рук сваіх».
 
Ён уратуе нявіннага, і будзеш ты ўратаваны ў чысціні рук сваіх».