Ёва 22 разьдзел

Кніга Ёва
Пераклад Яна Станкевіча → Пераклад Чарняўскага 2017

 
 

І адказаў Еліфаз Феманянін, і сказаў:
 
У адказ Эліфаз Тэманіт сказаў:

«Ціж можа чалавек быць карысны Богу? Пэўне мудры карысны сабе самому.
 
«Ці можа чалавек быць карысным Богу, калі ён ледзь разумее, як самому сабе быць карысным?

Што за прыемнасьць Усемагучаму, калі ты справядлівы, альбо ці ё карысьць, што ты дзяржыш дарогі свае беззаганнымі?
 
Што за карысць Усемагутнаму, калі ты будзеш справядлівы, або што ты даеш Яму, калі б учыніў беззаганнай дарогу тваю?

Ці із страху цябе Ён гане цябе і ўходзе на суд із табою?
 
Ці ж за тваю пабожнасць будзе Ён дакараць цябе і пойдзе на суд з табою?

Хіба нягоднасьць твая вялікая, і намяш канца бяспраўю твайму.
 
Ды ці ж не праз ліхадзейнасць тваю шматлікую і бясконцую несправядлівасць тваю?

Ты браў заклады ад брата свайго ні зашта, і адзецьце ў голых ты здыймаў.
 
Бо ты ўзяў заклад ад братоў тваіх ні за што і з голых здымаў адзенне.

Усьмягламу не падаваў вады напіцца й галоднаму адмаўляў хлеба;
 
Ты не падаў вады спрацаванаму і галоднаму адмаўляўся даць хлеба.

А чалавеку плячыстаму — яму зямля, і важны жывець на ёй.
 
Хіба заможнаму чалавеку ўспамогаю будзе зямля і, завалодаўшы, ён будзе жыць на ёй?

Удовы ты адпушчаў з пустымі рукамі, і плячукі сіротаў мяжджуліў.
 
Удоў адпускаў ты з пустымі рукамі, і плечы сірот абцяжарваў.

Затое сілы навокал цябе, і спалохае цябе жах неўспадзеўкі.
 
Дзеля таго акружаны ты пасткамі і трывожыць цябе страх неспадзяваны.

Або цемнь, што ты ня бачыш, і паводка пакрывае цябе.
 
І ў цемры ты не бачыш, і напор вады прыціскае цябе.

Ці ня высака на нябёсах Бог? Бачыш найвышшыя гвезды, як яны высака!
 
Ці ж Бог не вышэйшы за неба? Паглядзі ўгару на зоркі, як яны высока!

Затым ты кажаш: "Што ведае Бог? можа Ён судзіць пераз глыбокую цемнь?
 
А ты кажаш: “Што там ведае Бог? Быццам бы Ён можа судзіць праз імглу.

Таўстыя булакі закрываюць Яго, так што Ён ня бача, а ходзе па скляпеньню нябёсным".
 
Хмары — покрыва Яго, і не бачыць Ён нашых спраў, і ходзіць [толькі] па крузе нябесным”.

Нягож ты дзяржышся вечнага гасьцінца, па каторым людзі несправядлівыя йшлі?
 
Ці ты прагнеш трымацца шляху спрадвечнага, па якім крочылі злачынцы,

Яны былі адцяты без пары, іхны под падмыла рака,
 
якія заўчасна былі знішчаны, і рака падмыла іх грунт?

Каторыя казалі Богу: "Адвярніся ад нас" і "Што можа Ўсемагучы зрабіць нам?"
 
Яны казалі Богу: “Адыдзіся ад нас!” і “Што можа зрабіць нам Усемагутны?”

А Ён паўніў дамы іхныя дабром. Але рада нягодных далёка ад мяне.
 
Калі Ён багаццем напоўніў дамы іх, іх думкі далёка былі ад Яго.

Бачылі справядлівыя й цешыліся, нявінны насьміхаўся зь іх:
 
Справядлівыя будуць бачыць і цешыцца, і чалавек беззаганны будзе смяяцца з іх:

"Ці не адцяты праціўнікі нашы, і пакіненае імі пажэрла цяпло?"
 
“Сапраўды прапала маёмасць іх, а рэшту іх паглынуў агонь”.

Пазнаёмся ж ізь Ім і будзеш у супакою, ад гэтага прыйдзе да цябе дабро.
 
Дык пагадзіся з Ім, і будзь спакойны, і праз гэта будзеш мець найлепшы плён.

Вазьмі ж із вуснаў Ягоных права і палажы словы Ягоныя ў сэрца свае.
 
Прымі з вуснаў Яго закон і пакладзі словы Яго ў сэрцы сваім.

Калі ты зьвернешся да Ўсемагучага, то будзеш збудаваны, калі аддаліш несправядлівасьць ад будану свайго.
 
Калі навернешся да Усемагутнага, адновішся і адкінеш далёка несправядлівасць ад палаткі сваёй.

І паложыш скарб у пыл і золата офірскае памеж скалаў цуркоў.
 
Прыпадобніш золата да парахна, а камяні Афіра — да рачнога пяску,

І будзе Ўсемагучы скарбам тваім і срэбрам дарагім табе;
 
Усемагутны будзе тваёй крыніцай каштоўных металаў і накопіцца срэбрам для цябе.

Тады ты пацешышся ў Усемагучым і ўзьнімеш від свой да Бога.
 
Тады будзеш мець дастаткова асалод ва Усемагутным і падымеш аблічча сваё да Бога.

Ты ўчыніш маленьне да Яго, і Ён пачуе цябе, і ты споўніш абятніцы свае.
 
З пакораю будзеш прасіць Яго, і Ён выслухае цябе, і ты споўніш абяцанні свае.

Ты пастановіш пастаноў, і ён станецца, на дарогах тваіх зазіхціць сьвятло.
 
Што пастановіш, прыйдзе да цябе, і на дарогах тваіх будзе свяціць святло.

Як яны паніжацца, то Ты скажаш: "Узвышчася!" Паніклага ачыма Ён спасае.
 
Бо Ён паніжае таго, хто гаворыць пыхліва, а хто апускае вочы, той будзе збаўлены.

Ён вывальняе нявіннага; Ты будзеш вывальнены чысьцінёю рук сваіх».
 
Ён уратуе нявіннага, і будзеш ты ўратаваны ў чысціні рук сваіх».