Ёва 33 разьдзел

Кніга Ёва
Пераклад Яна Станкевіча → Пераклад Чарняўскага 2017

 
 

Слухай, адылі, калі ласка, Ёве, мову маю і на ўсю гутарку маю ўважай.
 
Дык пачуй, Ёве, прамову маю і выслухай усе словы мае.

Вось жа, я адчыніў вусны свае; язык мой гукае ў паднябеньню маім.
 
Вось, я адкрыў вусны свае, і язык мой гаворыць у горле маім.

Словы мае ад шчырасьці сэрца майго, і веданьне вусны мае ясна вымаўляюць.
 
Ад шчырага сэрца мае словы, і чыстую праўду кажуць вусны мае.

Дух Божы ўчыніў мяне, і дых Усемагучага ажывіў мяне.
 
Дух Божы ўчыніў мяне, і подых Усемагутнага ажывіў мяне.

Калі можаш, адказуй імне, прыгатуйся перад імною і стань.
 
Калі можаш, адкажы мне, падрыхтуйся перада мною і падыміся.

Вось я, бы вусны твае перад Богам; з гліны ўхармаваны я.
 
Вось жа, я, як і ты, перад Богам, ды з таго ж самага бруду аддзелены і я.

Вось, страх мой хай не палохае цябе, даланя мая на табе хай ня будзе цяжкая.
 
Так што страх, які я наганяю, хай цябе не палохае, і цяжар мой хай не будзе цяжкі для цябе.

Але, ты гукаў у вушы мае, і голас словаў тваіх я чуў.
 
Тое, што ты сказаў, было ў вушах маіх, і голас слоў тваіх пачуў я:

Ты кажаш: "Я чысты, бяз выступу, нявінны я, і няма бяспраўя ў імне.
 
“Чысты я, без граху, беззаганны; і няма правіннасці ўва мне.

Вось, Ён знаходзе прычыны непрыязьньства да мяне, Ён мае мяне за непрыяцеля Свайго.
 
Паколькі ж Ён знайшоў падставы для скаргаў на мяне, то лічыць мяне Сваім ворагам;

Пастанавіў у калодкі ногі мае, цікуе на ўсі сьцежкі мае".
 
ногі мае закаваў у кайданы, пільнуе ўсе шляхі мае”.

Во ў гэтым не твая праўда, я адказую табе, бо Бог большы за людзіну.
 
Вось, ты ў гэтым несправядлівы, адкажу табе, бо Бог большы за чалавека.

Чаму ты сьперачаешся зь Ім, што Ён не здаець табе лічбы з усіх справаў Сваіх?
 
Чаму ты спрачаешся з Ім, што Ён не адказвае табе на ўсе словы?

Бо Бог гукае адным парадкам і другім, ня цяміцца гэта:
 
Раз кажа Бог і другі раз таго самага не паўтарае.

У сьне, у ночнай відзені, як нападае глыбокі сон на людзёў, як яны дрэмяць на ложках, —
 
Праз сон і ў бачанні начным, калі агортвае сон людзей і калі дрэмлюць яны на ложку,

Тады Ён адкрывае вушы людзкія і пячатавае навуку, даную ім,
 
тады адкрывае Ён вушы людзям і ўкладвае Сваё настаўленне,

Каб адвярнуць чалавека ад учынку, і гордасьць ад чалавека Ён хавае,
 
каб адвярнуць чалавека ад таго, што ён чыніць, і вызваліць яго ад пыхлівасці,

Ён узьдзержуе душу ягоную ад загубы й жыцьцё ягонае ад зьнішчэньня мячом.
 
вырываючы душу яго ад магілы і жыццё яго, каб не трапіў ён у яму смерці.

І навучае болям на ягоным ложку і болям у ягоных касьцёх, —
 
Дакарае яго таксама хваробаю на ложку яго, або болем безупынным у касцях яго.

І жыцьцё ягонае збрыдзе хлеб, і душа ягоная ласую ежу.
 
І хлеб агідным становіцца яму ў жыцці яго, і раней прыемная страва — душы яго.

Чэзьне цела ягонае, ажно яго ня відаць, і адкрываюцца косьці ягоныя, каторыя ня былі відаць.
 
Цела яго высыхае на вачах, і косці, якіх не было відаць, адкрываюцца.

І бліжыцца да ямы душа ягоная, і жыцьцё ягонае — да забіўцаў.
 
Набліжаецца Ён да знішчэння ў магіле, і жыццё яго — да сядзібы памерлых.

Калі будзе ў яго Ангіл-прычынца, адзін із тысяча, азнайміць людзіне пасьцівасьць ейную;
 
Калі будзе ў яго анёл-звястун, адзін з тысячы, каб абвясціць чалавеку справядлівасць,

І ён міласэрны да яго, і скажа: "Вывальні яго ад зыходу да долу; Я знайшоў выкуп".
 
то злітуецца Бог над ім і скажа: “Вызвалі яго, каб не ішоў ён у магілу, бо Я знайшоў тое, у чым яму можа быць літасць”.

Сьвежшае за дзяцюцкае стане цела ягонае, ён зьвернецца да дзён маладосьці свае.
 
Расквітнее цела яго лепш, чым у маладосці, і вернецца ён у дні юнацтва свайго.

Моле Бога, і Ён прыйме яго, і Ён абача від ягоны з гуканьням, Ён зьверне людзіне справядлівасьць яе.
 
Ён будзе маліць Бога, і Бог будзе спагадны да яго, і ўбачыць твар яго радасным, і верне чалавеку яго справядлівасць.

І ён будзе глядзець на людзёў, і скажа: "Ізграшыў я, і скрывіў простае, і бескарысна было імне".
 
Спявае ён людзям і кажа: “Я зграшыў і парушыў справядлівасць, але я не адплачана мне.

Ён вывальне душу ягоную ад зыходу да долу, і жыцьцё ягонае будзе аглядаць сьвятліню.
 
Ён вызваліў душу маю, каб не трапіла ў магілу, але, жывучы, бачыла святло”.

Вось, усе гэта робе Бог разы два, тры з мужчынам.
 
Вось, усё гэта робіць Бог два і тры разы з чалавекам,

Каб адвярнуць душу ягоную ад долу, каб ён сьвяціў у сьвятліні жыцьця.
 
каб адвесці душы іх ад магілы і прасвятліць святлом жывых.

Уважай, Ёве, слухай мяне, маўчы, і я буду гукаць.
 
Зважай, Ёве, і паслухай мяне, і памаўчы, пакуль я гавару.

Калі маеш што сказаць, адказаць імне, кажы, бо я зычу апраўленьня твайго.
 
Калі ж маеш, што сказаць, адкажы мне, гавары, бо хачу, каб ты аказаўся справядлівым.

Калі не; ты слухай мяне, маўчы, а я наўчу цябя мудрасьці».
 
Калі ж не маеш, то паслухай мяне; маўчы, і я навучу цябе мудрасці».