Ёва 27 разьдзел
Кніга Ёва
Пераклад Антонія Бокуна → Пераклад Чарняўскага 2017
І працягваў Ёў прамову сваю, і сказаў:
І дадаў Ёў, прцягваючы прыпавесць сваю, і сказаў:
«На жыцьцё Бога, Які адкінуў суд мой, і на Усемагутнага, Які да горычы давёў душу маю,
«Жыве Бог, Які пазбавіў мяне суда, і Усемагутны, Які прывёў да горычы душу маю,
пакуль яшчэ трывае дыханьне ў-ва мне, і пакуль Дух Божы ў ноздрах маіх,
бо, пакуль яшчэ трывае дыханне ўва мне і [пакуль] Дух Божы — у ноздрах маіх,
ня скажуць вусны мае няпраўды, і язык мой ня будзе гаварыць хлусьні.
не скажуць вусны мае несправядлівасці і язык мой не будзе гаварыць хлусні!
Далёкі я ад таго, каб лічыць вас праведнымі. Пакуль не памру, не адступлюся ад нявіннасьці маёй.
Барані, Божа, каб я лічыў вас справядлівымі; пакуль не памру, не адступлюся ад сваёй невінаватасці.
У праведнасьці маёй буду трымацца моцна і не адкіну яе, ня будзе дакараць сэрца маё дзён [жыцьця] майго.
Апраўдання свайго, якога пачаў я трымацца, не адкіну, не асуджае мяне сэрца маё за цэлае жыццё маё.
Няхай будзе як бязбожнік вораг мой, і той, хто паўстае супраць мяне — як злачынца.
Непрыяцель мой хай будзе, як бязбожнік, і праціўнік мой — як злачынца.
Якая надзея крывадушніка, калі ён будзе адсечаны, калі Бог забярэ душу ягоную.
Якая ж надзея бязбожніка, калі сцінае, калі забірае Бог душу яго?
Ці выслухае Бог крык ягоны, калі прыйдзе да яго бяда?
Ці выслухае Бог крык яго, калі прыйдзе да яго бяда?
Ці зможа ён цешыцца Усемагутным і клікаць Бога ўвесь час?
Ці зможа ён цешыцца Усемагутным і прызываць Бога ўвесь час?
Я навучу вас пра руку Божую, нічога не схаваю пра Усемагутнага.
Я апавяшчу вам пра руку Божую, нічога не буду ўтойваць з таго, што мае Усемагутны.
Вось, вы ўсё гэта бачылі, дык навошта пустая гаворка?
Вось жа, вы ўсё гэта бачылі, дык нашто пустая гаворка без прычыны?
Такая вось доля чалавека ліхога і спадчына крыўдзіцеля, якую атрымаюць яны ад Усемагутнага.
Такая вось доля грэшнага чалавека ў Бога і спадчына крыўдзіцеляў, якую атрымаюць ад Усемагутнага.
Калі памножацца сыны ягоныя, упадуць ад мяча, і нашчадкі ягоныя не насыцяцца хлебам.
Калі размножацца сыны яго, пад мечам будуць, і нашчадкі яго не насыцяцца хлебам.
Хто застанецца ад іх, тых зьнішчыць зараза, і ўдовы ягоныя ня будуць плакаць.
Тыя, што застануцца ад яго, будуць пахаваныя ў згубе, і ўдовы яго не будуць плакаць.
Калі назьбірае ён срэбра, як пяску, і нарыхтуе адзеньня, як гліны,
Калі наносіць ён срэбра, як пяску, і нарыхтуе адзення, як гліны,
ён, прыгатуе, але апранецца праведнік, і срэбра падзеліць нявінны.
ён, сапраўды, прыгатуе, але апранецца ў іх справядлівы, і срэбра падзеліць бязгрэшны.
Пабудаваў ён, як павук, дом сабе, і як вартаўнік зрабіў сабе будан.
Пабудаваў ён, як павук, дом сабе і, як вартаўнік, зрабіў сабе шалаш.
Багатым кладзецца спаць, і такім не ўстае, расплюшчыць вочы свае — і няма нічога.
Багаты, калі засне, нічога з сабой не забярэ; расплюшчыць ён вочы свае і нічога не знойдзе.
Ахопяць яго жахі, як паводка, і ўначы схопіць яго бура.
Ахопіць яго нястача, як вада, ноччу прыцісне яго навальніца.
Падхопіць яго вецер усходні і панясе, і віхура адарве яго ад месца ягонага.
Падхопіць яго вецер гарачы і панясе, ды, быццам віхура, сарве яго з месца яго.
Ён кіне яго і не пашкадуе, хоць будзе ўцякаць з рукі Ягонай.
Ён нашле ўсё гэта на яго і не пашкадуе; і будзе ўцякаць, каб уцячы з рукі Яго.
Будуць пляскаць над ім рукамі сваімі і засьвішчуць над ім на кожным месцы.
Будзе пляскаць над ім Сваімі рукамі і асвішча яго са Свайго месца.
