Давыдъ прииде къ Ахимелеху-жерцу и онъ далъ ест ему хлебовъ посвященныхъ ясти и оружие Голиафово; потом утече къ Ахису, царю Ефскому.
1 Тогда пришолъ естъ Давыдъ въ градъ Новей къ жерцу Ахимелехови; и устрашися Ахимелехъ, прото иже пришолъ ест к нему Давыдъ,
2 и рече ему: «Что се ест, яко самъ-единъ пришол еси и никого несть с тобою?» Рече Давыдъ къ Ахимелеху-жерцу: «Царь ми повелел, глаголя: “Абы никто не веделъ того, с чимъ я посылаю тебе и что есмъ росказал тобе”. Сего ради и слуги моя розослалъ есми на оно и на оно место.
3 Протожъ ныне, имаши ли что готоваго ясти, дай ми с пятеро хлебовъ, или что можежъ имети».a
4 Отвеща жрець къ Давыду и рече: «Не имамъ хлебовъ простых готовых, но имам хлебъ посвященный; суть ли чисты слузи твоиb, наболей от женъ, да едят и».
5 Рече же Давыдъ к жерцу: «Понеже воспомянул еси жены, воистинну въздержалися есмо от женъ вчера и предъ вчерашним, внегда вышли есмо на путь, и суть тела слугъ моих чиста. Ащели же путь сей нашъ скверенъ естъ, но мы днесь очистихомся на теле».
6 И далъ ест ему жрець хлебы посвященныеc, понеже не было ту иного хлеба, токмо хлебы посвященные, иже взяты были предъ лицемъ Господьним, да бы положилися въместо их хлебы теплыи.
7 И былъ естъ ту мужъ, един от отрокъ Сауловых, в храме Господьнем, именем Доехъ Ідумеянинъ, старейшина от пастырь Сауловых, сей пасяше мулици Сауловы.
8 Тогда рече Давыдъ къ жерцу Ахимелехови: «Имаши ли ту якое оружие в руце, копие или мечь, дай мне, яко оружия своего не взях, слова бо царева припужали мя отойти».d
9 И рече жрець: «Се мечь Голиафовъ, Филистымлянина, егоже убилъ еси в долине Смыръкове, естъ обвинутъ въ плащи за ризами жреческими. Хощеши ли того узяти, возми, иного бо меча зде не имамъ». И рече Давыдъ: «Понеже иного меча зде не имаши, дай жъ ми той».
10 Тогда въставъ Давыдъ и бежа от лица Саулова в той день и приде къ Ахису, царю Ефскому.
11 И рекоша къ Ахису слузи его, внегда узрели суть Давыда, яко сей ест Давыдъ, царь земли, и сему пояху жены, ликствующе и глаголюще: «Порази Саулъ тысещу, а Давыдъ десеть тысещей»?e
12 И положилъ естъ Давыдъ слова сия въ сердци своемъ, и убояся вельми Ахиса, царя Ефскаго,
13 и прекривилъ собе уста предъ Ахисомъ, и скерился межи ими, и билъ собою о двери, и слины текли ему по браде.
14 Тогда рече Ахисъ къ слугамъ своимъ: «Видяще человека безумна, почто приведосте его ко мне?
15 Еда ли ся намъ не доставаеть безумныхъ и устеклых, яко приведосте и пред мя, абы ту шалел предо мною? Пустите жъ его прочь, и да не ходить потомъ въ домъ мой».
a Ad marginem: Ниже, 25[:8].
b Лічбы, 18[:11].
c Мацвея, 12[:3-4] (зачын 44); Марка, 2[:25-26] (зачын 10); Лукі, 6[:3-4] (зачын 22).
d Ad marginem: Ниже, 22[:9].
e Ad marginem: Выше, 18[:7], Ниже, 29[:5]; Ісуса, сына Сіраха, 47[:7].
Знайшлі памылку ў тэксце? Вылучыце яе і націсніце:
Ctrl + Enter
Первые Царствъ, 21 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.
