Первые Царствъ 26 Первые Царствъ 26 разьдзел

¹ Тогда пришли суть паки Зифеане къ Саулу въ Гаваа, глаголюще: «Се, Давыд криется на холме Ахиле, иже естъ противъ пустыни».

² И вставъ Саулъ и иде въ пустыню Зифейску, и с нимъ три тысещи мужъ, избранныхъ от Израиля, искати Давыда въ пустыни Зифейской.

³ И сталъ ест Саулъ с людми своими въ Гаваа, Ахиле, иже было противу пустыни на пути. Давыдъ же живяше въ пустыни, и видя, яко прииде Саулъ искати его в пустыню,

⁴ послал испытателей и доведался певне, иже приближися к нему Саул.

⁵ Тогда въстав Давыдъ тайне и идяше на место, на немже стояше Саулъ с людми своими. И внегда узрелъ место, где спалъ естъ Саулъ и Авенер, сынъ Нировъ старейший, воевода его (Саулъ же лежаше въ шатре своемъ, а иные людие около его),

⁶ и рече Давыдъ къ Ахимелеху Хетейскому и къ Ависаи, сыну Сарвиину, брату Іоавову, глаголя: «Кто пойдеть со мною въ станы къ Саулу?» Рече Ависаи: «Азъ пойду с тобою».

⁷ И пришли суть Давыдъ и Ависаи до войска вночи, и знайдоша Саула лежаща и спяща въ шатре своемъ, и копие уткнено было в землю в главы его. Авенера же и иных людей видели суть спящих около его.

⁸ И рече Ависаи къ Давыду: «Се, предалъ естъ Господь врага твоего днесь в руце твое. Протожъ да прободу его наскрозе копиемъ к земли единою, и вдругое не будет потреба».

⁹ И рече Давыдъ къ Ависаи: «Не убивай его, кто убо простергый руку свою на помазанника Господьня, и будеть чистъ от греха?»

¹⁰ И рече паки Давыдъ: «Живъ естъ Господь, аще не Господь Самъ поразит его, или день смерти его приидеть, или в бои убиють и.a

¹¹ Не дай ми того Богъ, абыхъ въстягъ руку свою и забилъ помазанника Господьня. Протож ныне возмимо копие его, еже ест у главахъ, и чашу с водою и подмо проч».

¹² И взялъ Давыдъ копие и чашу с водою, еже бе у главы Сауловы, и от[ъ]идоша.b И не бе ни единый, онже бы виделъ и поразумелъ или почулъ, но вси спаху, понеже твердый сонъ нападе на них от Господа.

¹³ Внегда же проидоша войско, сталъ ест Давыдъ поодаль, на верху горы, противу войска, и былъ естъ далекий путь межи ними.

¹⁴ И возпи Давыдъ къ людемъ и къ Авенеру, сыну Нирову, глаголя: «Авенеръ, Авенеръ! Почто не отвещаеши мне?» И рече Авенеръ: «Кто еси ты, иже вопиши и не даешъ царю спати?»

¹⁵ Тогда рече Давыдъ къ Авенеру: «Се, ты мужъ еси. И кто иный подобенъ тобе въ Израили? И чему жъ не стрежеши господина своего царя, яко се единъ от людей чужих былъ ест у войще вашем и хотел убити царя, господина твоего?

¹⁶ Не ест то добро, еже учинил еси: живъ ест Господь, яко годнисте смерти вы, иже не стрегосте господина вашего, помазанника Божия. И ныне погледи, где ест копье царево и чаша с водою, иже была у главахъ его».

¹⁷ И позналъ естъ Саулъ гласъ Давыдовъc и рече: «Еда ли гласъ твой ест сее, сыну мой Давыде?» Отвеща же Давыдъ: «Глас мой ест, господине мой царю».

¹⁸ И рече: «Почто тако ищеши безглавия раба твоего, господи мой? И что ти учинихd или чимъ провиних пред тобою?

¹⁹ Ныне послухай, молю ти ся, царю, слов раба твоего: возбужает ли тебе Господь на мя, да принесется жертва, ащели же люди сее чинят, прокляти суть пред лицемъ Божиимъ, яко изгоняют мя днесь, абых не пребывал в достоании Господьнем, глаголюще: “Иди и работай богом чужим”.

²⁰ И ныне не будет вылита кровь моя на землю пред Господем, прото иже вышол ест царь Ізраилевъ, абы гонил мене, яко блоху едину, и искалъ, яко куроптвы по горах».

²¹ Тогда рече Саулъ: «Съгреших; навратися, сыну мой Давыде, се убо к тому николи не учиню тобе зла, прото иже еси драго важилъ собе живот мой предъ очима своима. Днесь познахъ, яко неразумне чиних и не ведех многих речей».

²² Отвеща же Давыдъ и рече: «Се копие царево, да идеть семо единъ от отрок царевых и возметь е.

²³ И Господь да воздасть единому каждому по правде и по вере его, предал убо был тя Богъ днес в руце мое, и не хотех возтягнути руки своея на помазанника Господьня.

²⁴ И яко возвеличена ест днес душа твоя пред очима моима, тако возвеличена будеть душа моа пред лицем Божіим, и избавит мя Бог от всякое скорби».

²⁵ И рече Саулъ къ Давыду: «Благославен ты от Господа, сыну мой Давыде! Се, чиняй учиниши и можай возможеши». И иде Давыдъ путемъ своим, Саул же от[ъ]иде в домъ свой.