Первые Царствъ 24 Первые Царствъ 24 разьдзел

¹ Давыдъ же от[ъ]иде оттуду и вселися во узинах Енъгадских.

² И внегда навратился Саул по гонении Филистымлянъ, возвестиша ему: «Се, Давыдъ естъ въ пустыни Енъгадской».

³ Тогда взялъ с собою Саулъ три тысещи мужей, избранныхъ от всехъ людей Ізраилевых, и иде искати Давыда и мужей его, тежъ и по высоких скалах, по нихже толико могуть ходити дикии козлове;

⁴ и прииде къ хлевомъ овчим, еже былъ узрелъ, идущи путемъ. И была ту ест пещера, до неяже внииде Саулъ изпразнити чрево свое; Давыдъ же и мужи его в той пещере, внутри съкрившеся, седяху.

⁵ Тогда рекоша къ Давыду слузи его: «Се день той, о немже рече к тобе Господь: “Азъ предамъ врага твоего в руце твое, да учиниши с нимъ, якоже будеть любо предъ очима твоима”». Тогда усталъ Давыдъ и тайне урезалъ кусъ плаща воскрилия Саулова.

⁶ Потомъ бился въ перси своя Давыдъ прото, иже урезалъ кусъ плаща воскрилия Саулова,

⁷ и рече къ мужемъ своимъ: «Да милостивъ будеть мне Господь, не учиню бо того господину моему, помазаннику Божию, абыхъ въстягъ руку мою на него, яко помазанникъ Божий естъ, живъ ест Господь Богъ, аще не Самъ Господь погубить его, или внегда приидеть день смерти его, альбо егда пойдеть на войну и тамъ убиють и.a Не дай ми того Богъ, абыхъ възнял на помазанника Господьня».

⁸ И укроти Давыдъ мужи своя словесы таковыми, и не далъ имъ въстати и забити Саула. Тогда вышедъ Саулъ с пещеры и идяше путемъ.

⁹ Въсталъ же и Давыдъ, и выйде с пещеры, и возпи за Саулом, глаголя: «Господине мой царю!» И озреся Саулъ назадъ. И поклонися Давыдъ, и паде на землю,

¹⁰ и рече къ Саулу: «Почто послушаеши слов людей лживыхъ, глаголющихъ к тобе: “Давыдъ ищеть злого твоего?”

¹¹ Се, ныне видели очи твое, яко предалъ тя. Богъ в руце мое, внегда былъ еси в пещере. И помыслихъ убити тя, но презре тебе око мое, рекох бо: “Не простру руки моея на господіна моего, царя, яко помазанникъ Господень ест”.

¹² Но более, отче мой, возри и познай кусъ воскрилия плаща твоего в руках моих, понеже внегда резахъ воскрилие плаща твоего, не хотех протягнути руки своея на тя. Прото разумей и видь, яко несть злости в рукахъ моих ни безакония и ни съгреших противу тобе. Ты же ищеши души моея, погубити ю:

¹³ да судить Господь Богъ межи мною и тобою и да помстит мене Господь надъ тобою, руце же мое не будуть на тобе.

¹⁴ Якоже въ присловии старомъ глаголется: “От злыхъ людей изыйдеть злость”. Сего для не посяжеть рука моя на тя.

¹⁵ Кому ся противиши ныне, царю Ізраилевъ, и кого гониши? Пса мертваго гониши и блоху едину.

¹⁶ Да будеть Господь судьею и да разсудит межи мною и тобою, Той узрить и судит прю мою и избавить мя от рукъ твоих».

¹⁷ И внегда доконал ест Давыдъ, глаголя слова таковая къ Саулу, отвеща Саулъ: «Еда ли твой сее естъ гласъ, сыну мой Давыде?» И возпи Саулъ гласомъ своимъ, и плакася,

¹⁸ и рече къ Давыду: «Справедливший еси паче мене, ты убо учинилъ мне доброе, азъ же воздаваю тобе злое;

¹⁹ и се, ты явилъ днесь, что учинил ми еси добраго, яко предал мя былъ Господь в руце твое и не забил еси мене.

²⁰ И кто естъ таковый, знашедъ врага своего, и пустил бы его с миром отыйти в путь добрый? Но Господь да воздасть тобе по всей добродетели твоейb, яко и ты мне добре учинилъ есь.

²¹ И ныне, се, воистинну знаю, яко царствовати будеши по мне и будеши имети в руце твоей царство Ізраилево.

²² Протож клинися мне Господемъ, абы не погубилъ роду моего и ни зъгладил имени моего з дому отца моего».

²³ И клялся ест Давыдъ Саулови. И навратися Саулъ в домъ свой, Давыдъ же и мужи его от[ъ]идоша на места крепкая.