Первые Царствъ 17 Первые Царствъ 17 разьдзел

¹ Собравши же Филистымляне войска своя к бою и сошлися въ Сихотъ Іюдинъ, и положилися межи местомъ Сихотъ и межи Азехою, на пределех Домних.

² Саул же и мужи Ізраилевы собрашеся и приидоша до долины Смръковое и строяхуся к бою противъ Филистымляном.

³ Филистымляне же стояли на горе, еже была противу имъ, сынове же Ізраилевы стояли на другой стране горы, и долина бе посреде их.

⁴ Тогда вышолъ естъ з войска Филистымскаго мужъ нечистый, именемъ Голиаф, изъ Еффы; высота его бе шесть локтевъ и пяди,

⁵ и шоломъ медянъ на главе его, и панцер его, в оньже облачашеся, бе яко юже звитые,

⁶ на ногахъ теже наколенки медяные имеяше и щитъ медянъ на раменю его;

⁷ и древо копия его было тако толсто, яко навивало ткачево, железо же острое, еже было на конці копия его, важило ест шестьсотъ лотовъ, и носяй оружие его идяше пред нимъ.

⁸ Тогда ставъ и возпи предъ полки Ізраилевыми: «Почто есте пришли, к бою готови суще? Се, азъ Филистымлянинъ, а вы — раби Саулови. Выберите с себе мужа, да идеть и биется со мною:

⁹ победит ли мене, будемы ваши раби, пакли жъ я его побежу, то вы будте наши раби».

¹⁰ И глагола к тому Голиафъ: «Азъ учиню срамоту днесь войску Ізраилеву. Выдайте ми мужа и будемы ся сама два бити».

¹¹ Слышав же Саулъ и весь Ізраиль слова такова Филистымлянина того, удивишеся и убояшеся велми.

¹² Давыдъ же бе сынъ мужа ефратейска, о немъже первей поведано ест, от Вифлеома Іюдина, емуже имя Иесей. Той же Иесей имелъ ест осмъ сыновъ и бе мужъ велми старый во днехъ Сауловыхъ и долговечный межи мужми.

¹³ И пошли суть были на войну съ Сауломъ три сынове его старъшии: первого звали Елиавъ, втораго Аминадавъ, а третиего Семмаа.

¹⁴ Давыд же бе найменший, и внегда три браты его старшии идяху на войну съ Сауломъ,

¹⁵ отшолъ ест Давыдъ от Саула и навратился домовъ пасти стадо отца своего въ Вефлиоме.

¹⁶ Филистымлянин же Голиафъ всегда исхожаше рано и увечере, вызываючи к бою, за четыредесятъ дней.

¹⁷ Тогда рече Иесей къ Давыду, сыну своему: «Возми братии твоей меру пражма и десеть хлебовъ и неси е до войска братии твоей,

¹⁸ и десеть сырцевъ дай воеводе войска; и наведиши братию твою, и доведаешися, яко ся с ними дееть и в которомъ суть полце».a

¹⁹ Саулъ же и вси людие Ізраилеви, лежаще в долине Смръкове, воевалися суть съ Филистымляны.

²⁰ Тогда Давыдъ, въставъ рано, подалъ иному стадо, и побравъ тыи вси речи, шол до войска, якоже повелелъ ему отець его, Иесей, и пришолъ естъ на место, рекомое Магала, и до полковъ, ониже тогда кричали, к бою идуще,

²¹ понеже тогда людие Ізраилевы справовалися къ бою, а Филистымляне теже были противу имъ готови.

²² Тогда Давыдъ, оставив тыи речи, еже былъ принесъ, и беремена далъ стеречи иному, бежалъ к тому месту, где ся мели бити, и пытался братии своей, яко ся с ними деет.

²³ И внегда еще молвяше с ними, се, указался ест той поганый мужъ, именемъ Голиафъ, Филистымлянин от Еффы, з войска Филистымскаго, и молвил слова тая жъ, яко и превей, вызываючи некого къ бою; и Давыдъ то слышалъ.

²⁴ Вси же мужи Ізраилеви, внегда узрели суть Голиафа, утекали пред ним, боялися бо его велми,

²⁵ и глагола единъ къ другому: «Видел ли еси того мужа, онже прииде? Посрамотити убо войско Ізраилево пришолъ естъ; сего для кто бы забил мужа того, царь даровал бы тому богатества много, и дщеру свою дал бы за жену ему,b и домъ отца его высвободить, абы дани не давал въ Израили».

²⁶ И рече Давыдъ к мужем, иже с ним стояли суть: «Что будеть дано мужу тому, онже бы забилъ Филистымлянина сего и отнял бы срамоту от Израиля? И який то естъ поганъ, иже срамотить войско Бога живаго?»

²⁷ И поведали суть ему людие вторицею, глаголюще, иже тое будеть дано мужу тому, онже бы забилъ его.

²⁸ Сия пакъ внегда услышалъ ест Елиавъ, братъ Давыдовъ старший, иже говорить съ иными, разгневался на Давыда и рече: «Почто еси пришолъ и чему не паслъ еси дома овець, но покинулъ есь их в пустыни? Знаю я гордость твою и спорность серца твоего, яко того для еси пришол, абы ся дивовал войску и битве».

²⁹ Отвеща ему Давыдъ: «Что жъ есмъ уделал,c ижех с ними молвилъ?»

³⁰ И отшед от него, приступив къ иному и пытал, что дасть царь мужу тому, онже бы забилъ Филистымлянина того; и отвещали ему, яко и первей.

³¹ Тогда слышали суть слова Давыдоваd и поведили е Саулови. И внегда приведоша его предъ Саула,

³² рече Давыдъ къ Саулу: «Да не страшится сердце чие о том. Азъ, рабъ твой, пойду и буду ся бити съ Филистымлянином тымъ».

³³ И рече к нему Саул: «Не можешъ ты одолети Филистымлянину тому и ни битися с ним, яко млад еси; той же военный мужъ от своея младости ест».

³⁴ Рече же Давыдъ къ Саулу: «Азъ, рабъ твой, внегда пасывах стадо отца своего, прихожаше левъ или медведь и взимаше овцу от стада,

³⁵ текохъ за ними и выдирахъ ю изъ устъ их; и егда противляше ми ся, взяхъ за челюсть его и удавихъ и, и забихъ и.

³⁶ Яко азъ, рабъ твой, и льва удавих, и медьведя забихъ, сего ради будеть и Филистымлянин сей, яко единъ от нихъ. Ныне да иду и отыйму посрамочение людей, понеже який то естъ Филистымскый поганъ, иже смелъ естъ злоречити войска Бога живаго?»

³⁷ И рече паки Давыдъ къ Саулу: «Господь Богъ, иже избавил мене от устъ льва и от пащекъ медьведя, той теже избавить мене от руку Филистымлянина погана сего». Рече же Саулъ къ Давыду: «Иди, и Господь да будеть с тобою».

³⁸ И облече Саулъ Давыда въ зброю свою, и шолом медянъ възложилъ на главу его, и облече и в панцерь;

³⁹ и Давыдъ, припоясав к собе мечь, начал куситися, естли бы моглъ во зброи ити, яко не имел обычая пред тым ходити въ зброи. Тогда рече Давыдъ къ Саулу: «Не могу такъ, въ зброи, ити, понеже не привыклъ есми».e И звлече с себе,

⁴⁰ и взялъ посохъ свой, иже всегда имеваше в руце своей, и выбрал собе пять каменков с потока найлучнейших, и вложил е въ мошницу пастырскую, юже ношаше с собою, и пращу взялъ в руку, и шолъ противу Филистымлянину.

⁴¹ Тогда и Филистымлянинъ идяше противъ Давыда, и носяй оружие его пред ним.

⁴² И внегда приближился къ Давыдови и узрелъ и, погорделъ имъ, былъ убо Давыдъ младенець черменъ доброго возренья.

⁴³ И рече Филистымлянинъ къ Давыду: «Еда ли песъ есмъ, яко идеши на мя с посохомъ?» И проклял естъ Филистымлянин Давыда идолы своими,

⁴⁴ и рече къ Давыду: «Пойди семо, ко мне, и дамъ тело твое зверемъ земнымъ и птицамъ небесным».

⁴⁵ Рече же Давыдъ къ Филистымлянину: «Ты идеши противу мене з мечемъ, а с копьемъ, и зъ щитомъ, азъ же иду противу тебе во имя Господа, Бога силамъ, Бога Ізраилеваf, Егоже войско злоречилъ еси днесь,

⁴⁶ и предасть тебе Господь Богъ в руце мое, и забию тебе, и отсеку главу твою, и дамъ днесь тела мертва полковъ Филистымскых зверемъ земным и птицамъ небеснымъ,

⁴⁷ да разумееть вся земля, иже Богъ естъ во Израили, и да познаеть весь снемъ сей, яко не мечем ани оружиемъ спасаеть Господь Богъ,g Того убо естъ брань, и подасть васъ в руце наши».

⁴⁸ Внегда же идяше Голиафъ и приближашеся къ Давыду, поспешилъ Давыдъ и бежалъ противу ему,

⁴⁹ и вынял камень единъ з мошници и вложилъ до праще, и заточив, выверже и удари Голиафа в чело, аже увязъ камень в челе его, и паде на лице свое на землю.

⁵⁰ И победи Давыдъ Филистымлянина пращею и каменем, и забилъ его.

⁵¹ И внегда не имеаше Давыдъ меча в рукахъ своих, прибежал къ Филистымлянину и, стоя над нимъ, вытягнулъ мечь его и отсече ему главу. Видевши же сия Филистымляне, яко умертвенъ естъ силный ихъ, побежаша вси.h

⁵² Сынове же Ізраилеви и мужи Июдины, выскочивши ис становъ своих, кричали суть и гонили суть Филистымлянъ, аже пришли до долины и до вратъ града Аккарона; и падоша ранени Филистымляне на пути Саримъ даже до Етфа и до Аккарона.

⁵³ И навратившися сынове Ізраилеви, внегда прогнали суть Филистымлянъ, вниидоша въ станы ихъ.

⁵⁴ И взялъ ест Давыдъ главу Голиафову и внесе ю въ Ерусалимъ. Зброю же его положил въ храме Божиемъ.

⁵⁵ В то пак время, егда шолъ естъ Давыдъ противъ Голиафа, пытался Саулъ Авенера, воеводы своего, глаголя: «От коего колена естъ младенець сей?» И отвеща Авенеръ: «Жива ест душа твоя, царю, яко не вемъ».

⁵⁶ И рече царь: «Спытай ты, чий ест сынъ младенець сей».

⁵⁷ И внегда навратился Давыдъ, забивъ Голиафа, поя его Авенеръ-воевода и уведе и предъ Саула, главу Голиафову деръжащего у рукахъ своих.

⁵⁸ И рече к нему Саулъ: «От коего колена есь, младенче?» Отвеща Давыдъ: «Сынъ раба твоего Иесея, мужа Ефлиомеска, есмъ азъ».