1 да Карынфянаў 12 разьдзел

Першае пасланьне да Карынфянаў
Пераклад Чарняўскага 2017 → Пераклад Яна Станкевіча

 
 

Не хачу, браты, каб вы не ведалі пра духоўныя дары.
 
Узглядам жа духоўных дароў, браты, не хачу, каб вы ня ведалі.

Бо вы ведаеце, як вы былі паганамі, дык хадзілі да нямых ідалаў, быццам вялі вас.
 
Ведаеце, што, як вы былі пагане, дык хадзілі да бязмоўных балваноў, бы воджаныя.

Дзеля таго даводжу вам, што ніхто, хто гаворыць у Духу Божым, не кажа: «Анатэма Ісусу!» Ды ніхто не можа назваць Госпадам Ісуса, як толькі ў Духу Святым.
 
Затым азнаймую вам, што ніхто, Духам Божым гукаючы, ня скажа: «Праклён на Ісуса!» і ніхто ня можа сказаць: «Спадар Ісус», хіба Духам Сьвятым.

Розныя дары ласкі, але адзін і той самы Дух.
 
Дары ж розныя, але Дух тый самы;

І адрозненні ў служэннях, але той самы Госпад.
 
І службы розныя, а Спадар тый самы;

І адрозненні ў дзейнасці, але той самы Бог, Які ўсё ва ўсіх робіць.
 
І дзеяньні розныя, а Бог тый самы, Каторы дзее ўсе ў вусіх.

Кожнаму даецца аб’яўленне Духа для карысці.
 
Але кажнаму даецца выяўленьне Духа на карысьць:

Аднаму даецца Духам слова мудрасці, другому даецца тым самым Духам слова ведання,
 
Аднаму даецца Духам слова мудрасьці, другому слова веды, тым жа Духам;

яшчэ іншаму даецца вера тым жа Духам, іншаму — дары аздараўлення тым самым Духам,
 
Іншаму вера, тым жа Духам; а іншаму дары ўздараўленьня, тым адным Духам;

іншаму — чыніць цуды, іншаму — праракаванне, іншаму — распазнаванне духаў, іншаму — розныя мовы, іншаму — тлумачэнне моў.
 
А іншаму чыненьне магутнасьцяў, іншаму прароцтвы, іншаму адрозьненьне духоў, іншаму розныя мовы, іншаму зьясьненьне моваў.

Усё гэта робіць адзін і той самы Дух, даючы кожнаму, як Ён хоча.
 
Але ўсе гэта дзее адзін а тый самы Дух, удзяляючы апрычона кажнаму, подле замеру свайго.

Як адно цела мае многа членаў, а ўсе члены аднаго цела, хоць іх многа, твораць адно цела, так і Хрыстос.
 
Бо як цела адно, але мае шмат чаланоў, і ўсі чаланы адно цела, хоць шмат, але адно цела, — так і Хрыстос.

Мы бо ўсе адным Духам ахрышчаны ў адно цела, ці то юдэі, ці то грэкі, ці то нявольнікі, ці то свабодныя, і ўсе напоены адным Духам.
 
Бо запраўды адным Духам хрысьціліся ўсі мы ў вадно цела, ці то Жыды ці то Грэкі, ці то нявольнікі ці то вольнікі; і ўсім даны піць адзін Дух.

А цела складаецца не з аднаго члена, але з многіх.
 
Бо запраўды цела не адзін чалон, але шмат.

Калі б нага сказала: «Я не ад цела, бо я не рука», дык няўжо яна таму і не ад цела?
 
Калі нага скажа: «Я ня часьць цела, бо я ня рука», дык нягож яна затым ня часьць цела?

Або калі вуха скажа: «Я не ад цела, бо я не вока», дык няўжо яно і не ад цела?
 
І калі вуха скажа: «Я ня вока, дык я ня часьць цела», дык нягож яно затым ня часьць цела?

Калі б усё цела было вокам, дзе ж слых? А калі б усё цела было б слых, дык дзе нюх?
 
Калі ўсе цела вока, дык ідзе чутасьць? Калі ўсе чутасьць, дык ідзе нюх?

Але цяпер Бог размясціў члены так, што кожны з іх у целе, як Ён захацеў.
 
Але Бог расклаў чаланы, кажны зь іх у целе, як Ён зычыў.

А калі б усе былі адным членам, дык дзе ж цела?
 
Калі б усі былі адзін чалон, дык ідзе цела?

Вось цяпер членаў многа, а цела — адно.
 
Але цяпер чаланоў шмат, а цела адно.

Не можа вока сказаць руцэ: «Ты мне непатрэбна!» або галава нагам: «Вы мне не патрэбны!»
 
Ня можа вока сказаць руццэ: «Ты імне непатрэбняя»; альбо таксама галава нагам: «Вы імне непатрэбныя».

Наадварот, члены цела, якія падаюцца слабейшымі, больш патрэбныя,
 
Наадварот, чаланы цела, што здаюцца слабшыя, шмат патрабнейшыя.

ды тыя, якія мы лічым менш пачэснымі ў целе, мы акружаем асаблівай пашанай, а тыя, што лічацца непрыстойнымі, маюць асаблівае ўшанаванне,
 
А каторыя мы ўважаем за меней пачэсныя ў нашым целе, тыя акружаем большым збыткам, і нашы менш пачэсныя чаланы ў большым збытку прыгажосьць маюць;

а нашы прыстойныя не патрабуюць нічога. Але Бог уфармаваў цела, даўшы большую пашану таму, якому не хапае,
 
А нашы прыгожыя таго не патрабуюць. Але Бог так сумерна ўладзіў цела, даючы чэсьць у большым збытку патрабуючым сьці,

каб не было ў целе раздзялення, але каб паасобныя члены рупіліся адзін аб адным.
 
Каб ня было падзелу ў целе, але каб чаланы мелі тую самую рупнасьць адзін праз аднаго.

Такім чынам, калі церпіць адзін член, церпяць з ім усе члены. Падобна, калі славіцца адзін член, радуюцца з ім усе члены.
 
І калі адзін чалон церпе, усі чаланы церпяць ізь ім; і калі адзін чалон славіцца, усі чаланы цешацца зь ім.

Вы — Цела Хрыстова, а паасобна — члены.
 
І вы — цела Хрыстова, а паасобку — чаланы.

І адных Бог паставіў у Царкве па-першае — Апосталамі, па-другое — прарокамі, па-трэцяе — настаўнікамі, потым тых, што маюць моц чынення цудаў, потым дары аздараўлення, дар успамогі, дар гаспадаравання, дар усякіх моў.
 
А іншых Бог пастанавіў у царкве, першае — апосталаў, другое — прарокаў, трэйцяе — вучыцеляў; адлі магутнасьці, тады дары ўздараўляньня, памогі, раджаньня, розныя мовы.

А ці ўсе Апосталы? Ці ўсе прарокі? Ці ўсе настаўнікі? Ці ўсе сілы?
 
Ці ўсі апосталы? ці ўсі прарокі? ці ўсі вучыцелі? ці ўсі магутнасьці?

Ці ўсе маюць дары аздараўлення? Ці ўсе гавораць мовамі? Ці ўсе тлумачаць?
 
Ці ўсі маюць дары ўздараўленьня? ці ўсі гукаюць мовамі? ці ўсі зьясьняюць?

Рупцеся аб дарах большых, а я вам пакажу шлях яшчэ больш дасканалы.
 
Але жадайце горача дароў большых; і яшчэ вышшыя дарогі пакажу вам.