Быццё 5 разьдзел
Быццё
Пераклад Васіля Сёмухі → Пераклад Антонія Бокуна
І вось радавод Адама: калі Бог стварыў чалавека, паводле падабенства Божага стварыў яго,
Вось кніга радаводу Адама. У дзень, калі Бог стварыў Адама, зрабіў яго на падабенства Божае,
мужчыну і жанчыну стварыў іх, і дабраславіў іх, і даў ім імя: чалавек, у дзень стварэньня іх.
мужчыну і жанчыну стварыў іх, і дабраславіў іх, і назваў іх імя “чалавек” у дзень стварэньня іх.
Адам жыў сто трыццаць гадоў, і спарадзіў сына паводле падабенства свайго і паводле вобразу свайго, і даў яму імя: Сіф.
І жыў Адам сто трыццаць гадоў, і нарадзіў [сына] на падабенства сваё, як вобраз свой, і назваў імя яго Сэт.
Дзён Адама пасьля нараджэньня ім Сіфа было васямсот гадоў, і спарадзіў ён сыноў і дачок.
І было дзён Адама па нараджэньні Сэта васемсот гадоў, і нарадзіў ён сыноў і дачок.
А ўсіх дзён жыцьця Адамавага было дзевяцьсот трыццаць гадоў; і ён памёр.
І былі ўсе дні Адама, якія ён жыў, дзевяцьсот трыццаць гадоў, і ён памёр.
Сіф жыў сто пяць гадоў і спарадзіў Эноса.
І жыў Сэт сто пяць гадоў, і нарадзіў Эноса.
Пасьля нараджэньня Эноса Сіф жыў васямсот сем гадоў і спарадзіў сыноў і дачок.
І жыў Сэт па нараджэньні Эноса васемсот сем гадоў, і нарадзіў сыноў і дачок.
А ўсіх дзён Сіфавых было дзевяцьсот дванаццаць гадоў; і ён памёр.
І былі ўсе дні Сэта дзевяцьсот дванаццаць гадоў, і ён памёр.
Энос жыў дзевяноста гадоў і спарадзіў Каінана.
І жыў Энос дзевяноста гадоў, і нарадзіў Кейнана.
Пасьля нараджэньня Каінана Энос жыў васямсот пятнаццаць гадоў і спарадзіў сыноў і дачок.
І жыў Энос па нараджэньні Кейнана васемсот пятнаццаць гадоў, і нарадзіў сыноў і дачок.
А ўсіх дзён Эносавых было дзевяцьсот пяць гадоў; і ён памёр.
І былі ўсе дні Эноса дзевяцьсот пяць гадоў, і ён памёр.
Каінан жыў семдзесят гадоў і спарадзіў Малелэіла.
І жыў Кейнан семдзясят гадоў, і нарадзіў Магалялеэля.
Пасьля нараджэньня Малелэіла Каінан жыў васямсот сорак гадоў і спарадзіў сыноў і дачок.
І жыў Кейнан па нараджэньні Магалялеэля васемсот сорак гадоў, і нарадзіў сыноў і дачок.
А ўсіх дзён Каінанавых было дзевяцьсот дзесяць гадоў; і ён памёр.
І былі ўсе дні Кейнана дзевяцьсот дзесяць гадоў, і ён памёр.
Малелэіл жыў шэсьцьдзясят пяць гадоў і спарадзіў Ярэда.
І жыў Магалялеэль шэсьцьдзясят пяць гадоў, і нарадзіў Ярэда.
Пасьля нараджэньня Ярэда Малелэіл жыў васямсот трыццаць гадоў і спарадзіў сыноў і дачок.
І жыў Магалялеэль па нараджэньні Ярэда васемсот трыццаць гадоў, і нарадзіў сыноў і дачок.
А ўсіх дзён Малелэілавых было васямсот дзевяноста пяць гадоў; і ён памёр.
І былі ўсе дні Магалялеэля васемсот дзевяноста пяць гадоў, і ён памёр.
Ярэд жыў сто шэсьцьдзясят два гады і спарадзіў Эноха.
І жыў Ярэд сто шэсьцьдзясят два гады, і нарадзіў Эноха.
Пасьля нараджэньня Эноха Ярэд жыў сто восемдзесят гадоў і спарадзіў сыноў і дачок.
І жыў Ярэд па нараджэньні Эноха васемсот гадоў, і нарадзіў сыноў і дачок.
А ўсіх дзён Ярэдавых было дзевяцьсот шэсьцьдзясят два гады; і ён памёр.
І былі ўсе дні Ярэда дзевяцьсот шэсьцьдзясят два гады, і ён памёр.
Энох жыў шэсьцьдзясят пяць гадоў і спарадзіў Мафусала.
І жыў Энох шэсьцьдзясят пяць гадоў і нарадзіў Мэтушэляха.
І хадзіў Энох прад Богам, пасьля нараджэньня Мафусала, трыста гадоў і спарадзіў сыноў і дачок.
І хадзіў Энох з Богам па нараджэньні Мэтушэляха трыста гадоў, і нарадзіў сыноў і дачок.
А ўсіх дзён Эноха было трыста шэсьцьдзясят пяць гадоў.
І былі ўсе дні Эноха трыста шэсьцьдзясят пяць гадоў.
І хадзіў Энох прад Богам; і ня стала яго, бо Бог узяў яго.
І хадзіў Энох з Богам, і ня стала яго, бо забраў яго Бог.
Мафусал жыў сто восемдзесят сем гадоў і спарадзіў Ламэха.
І жыў Мэтушэлях сто восемдзясят сем гадоў, і нарадзіў Лямэха.
Пасьля нараджэньня Ламэха Мафусал жыў сямсот восемдзесят два гады і спарадзіў сыноў і дачок.
І жыў Мэтушэлях па нараджэньні Лямэха семсот восемдзясят два гады, і нарадзіў сыноў і дачок.
А ўсіх дзён Мафусалавых было дзевяцьсот шэсьцьдзясят дзевяць гадоў; і ён памёр.
І былі ўсе дні Мэтушэляха дзевяцьсот шэсьцьдзясят дзевяць гадоў, і ён памёр.
Ламэх жыў сто восемдзесят два гады і спарадзіў сына,
І жыў Лямэх сто восемдзясят два гады, і нарадзіў сына,
і даў яму імя: Ной, сказаўшы: ён суцешыць нас у працы нашай і ў працы рук нашых, калі ўрабляцьме зямлю, якую пракляў Гасподзь Бог.
і назваў яго імя Ной, кажучы: «Ён пацешыць нас у рабоце нашай і ў працы рук нашых на зямлі, якую пракляў ГОСПАД».
І жыў Ламэх пасьля нараджэньня Ноя пяцьсот дзевяноста пяць гадоў і спарадзіў сыноў і дачок.
І жыў Лямэх па нараджэньні Ноя пяцьсот дзевяноста пяць гадоў, і нарадзіў сыноў і дачок.
А ўсіх дзён Ламэхавых было сямсот семдзесят сем гадоў; і ён памёр.
І былі ўсе дні Лямэха семсот семдзясят сем гадоў, і ён памёр.
Ною было пяцьсот гадоў; і спарадзіў Ной трох сыноў: Сіма, Хама і Яфэта.
І было Ною пяцьсот гадоў, і нарадзіў Ной Сэма, Хама і Яфэта.
