Псалтыр 85 псалом
Псалтыр
Пераклад Яна Станкевіча → Пераклад Л. Дзекуць-Малея
Кіраўніку хору. Сыноў Корыных. Псальма.
Кіраўніку хору: сыноў Карэявых. Псальм.
Ты прыяў зямлі Сваёй, СПАДАРУ, зьвярнуў палон Якаву,
Ты зьлітаваўся над зямлёй Тваёй, Госпадзе, Ты палон Якубавы вярнуў.
Дараваў бяспраўі люду Свайго, закрыў усі грахі яго (Сэля),
Ты зьняў віну з народу Твайго, дараваў ім усе грахі іхнія. (Зэля)
Забраў назад усе абурэньне Свае, узьдзержыўся ад палаючага гневу Свайго.
Ты зьдзяржаў Тваю ярасьць і гнеў Твой палючы адвярнуў.
Зьвярні нас, Божа спасеньня нашага, і спыні гнеў Свой на нас.
Адбудуй Ты нас, Божа, Успамога наша, супыні абурэньне Тваё на нас.
Ці на векі будзеш гневаціся на нас? ці гнеў Свой расьцягнеш з пакаленьня ў пакаленьне?
Няўжо-ж навекі на нас будзеш гневацца і гнеў Твой пашырыш на пакаленьні патомныя?
Ці Ты ня зьвернешся й не ажывіш нас, каб люд Твой цешыўся ў Табе?
Няўжо-ж не дасі нам аджыць нанова, каб народ Твой узрадаваўся ў Табе?
Пакажы нам ласку Сваю, СПАДАРУ, і спасеньне Свае дай нам.
Дай нам, Госпадзе, ўбачыць ласку Тваю, даруй нам спасеньне Тваё!
Паслухаю, што кажа Бог СПАДАР, бо Ён будзе казаць супакой люду Свайму а дабрачэсьлівым Сваім; але хай не зварачаюцца ізноў да дурноты.
Паслухаю я, што Госпад Бог кажа: Ён гаворыць аб супакоі для народу Свайго і для пабожных Сваіх, для тых, што сэрца сваё да Яго кіруюць. (Зэля)
Запраўды блізка спасеньне Ягонае да тых, што баяцца Яго, каб чэсьць Яго жыла ў зямлі нашай.
Запраўды, блізка ўспамога Яго дзеля тых, што баяцца Яго, каб слава Божая на зямлі нашай залунала.
Ласка а праўда сустрэліся, справядлівасьць а супакой пацалаваліся.
Ласка і праўда з сабой сустракаюцца, справядлівасьць і супакой цалуюцца.
Праўда ізь зямлі вырастае, і справядлівасьць ізь неба глядзіць далоў.
Праўда вырастае із зямлі, а справядлівасьць з нябёсаў пазірае.
Але, СПАДАР дасьць дабро, і зямля наша выдасьць плод свой.
І абдорыць нас Госпад добрым, а зямля наша дасьць свой плод.
Справядлівасьць пойдзе перад Ім і аберне ў дарогу сігні Ягоныя.
Ідзе справядлівасьць наперадзе Яго і стопы Ягоныя на шлях стаўляе.
