Выслоўяў Саламонавых 18 разьдзел

Кніга выслоўяў Саламонавых
Пераклад Чарняўскага 2017 → Пераклад Яна Станкевіча

 
 

Зручных выпадкаў шукае той, хто жадае пазбавіцца сябра; раздражняе яго ўсякая парада.
 
Дурыцца сваявол, у ўсе разумнае ўрываецца.

Бязглузды не адчувае асалоду ад разважлівасці — а толькі ад паказу ўласнага розуму.
 
Неразумны ня хоча розуму, але каб выказаць, розум свой.

Калі прыйдзе бязбожнік — прыйдзе і пагарда, а з ганьбай — знявага.
 
Як прыходзе нягоднік, прыходзе таксама грэбаваньне і зь няславаю сорам.

Словы з вуснаў чалавека — глыбокая вада, а крыніца мудрасці — багатая плынь.
 
Глыбокія воды слова вуснаў людзкіх, цякучы цурэй — жарало мудрасьці.

Нядобра прымаць чалавека бязбожнага, каб пахіснуць справядлівага ў законнасці яго.
 
Ня добра мець бачнасьць на асобу нягоднага, каб адхінуць справядлівага на судзе.

Вусны бязглуздага змешваюцца са сваркамі, а рот яго выклікае пабоі.
 
Вусны неразумнага прыводзяць да жалобы, і рот ягоны выклікае біцьцё.

Рот бязглуздага — яго пагібель, а вусны яго — пастка для душы яго.
 
Рот дурнога — загубеньне яму, і вусны ягоныя — пасадка душы ягонай.

Словы плеткара — быццам салодкія, і самі даходзяць да глыбіні чэрава.
 
Словы агуканьніка — як ласонікі, і яны зыходзяць да нутра жывата.

Той, хто ў працы сваёй млявы і нядбайны, той — брат знішчыцеля.
 
Таксама нярупатлівы да работы свае — брат раськідона.

Наймацнейшая цытадэль — імя Госпада; да яе спяшаецца справядлівы, і там ён узвысіцца.
 
Імя СПАДАРОВА — моцная вежа: уцякае да яе справядлівы, і ён бясьпечны.

Маёмасць багатага — трывалы горад яго, яна — быццам мур высокі ў думцы яго.
 
Багацьце багатырова — моцнае месца ягонае, і як высокая сьцяна ў ваччу ягоным.

Перад знішчэннем узвышаецца сэрца чалавечае, і перад услаўленнем — уціхамірваецца.
 
Перад патрышчаньням сэрца людзіны пыхатае, і перад славаю — пакора.

Хто спярша гаворыць, а потым слухае, — таму бязглуздасць і ганьба.
 
Хто адказуе ўперад, чымся пачуе, дурнота а сорам таму.

Дух чалавечы пераносіць немач сваю, але хто зможа падтрымаць зруйнаваны дух?
 
Дух людзіны жывіць яе ў няўздоленьню, але маркотны дух хто можа перажыць?

Сэрца разважлівае будзе валодаць ведамі, і вуха мудрых шукае ведаў.
 
Сэрца цямлівага прыдбаець веду, і вуха мудрых шукае веды.

Дар чалавека пашырае дарогу яго і да кіраўнікоў даводзіць яго.
 
Падарак чалавека даець яму прастору і прыводзе яго да вялікіх людзёў.

Хто першы гаворыць у спрэчцы — лічыцца справядлівым, а прыходзіць сябар яго і выкрые яго.
 
Справядлівы першы ў сваёй справе, але прыходзе прыяцель ягоны й скумае яго.

Жэрабя спыняе спрэчкі і таксама вырашае паміж магутнымі.
 
Жэрабя суймае вады й дзеле памеж дужых.

Брат, якога абражаюць, мацнейшы за моцны горад, а сваркі — як крэпасці гарадоў.
 
Уражаны брат, як моцнае места, і вады, як завалы замку.

З плода вуснаў чалавека насыціцца чэрава яго, а спараджэнні ўласных вуснаў уволю накормяць яго.
 
З пладоў вуснаў людзіны насыціцца жывот ейны: прыбыткам вуснаў сваіх ён насыціцца.

Смерць і жыццё ў руцэ языка; хто яго любіць — будзе есці плады яго.
 
Сьмерць і жыцьцё ў моцы языка, і любячыя яго паспытаюцца з пладоў яго.

Хто знайшоў добрую жонку — знайшоў дабро і атрымаў ласку ад Госпада.
 
Хто знашоў жонку, тый знашоў дабро й адзяржаў зычлівасьць СПАДАРОВУ.

Калі бедны гаворыць з маленнямі, то багаты будзе гаварыць жорстка.
 
З маленьням гукае бедны, а багаты адказуе гарэзьліва.

Чалавек можа быць паранены сябрамі, але ёсць сябар, які бліжэй за брата.
 
Людзіна, што мае прыяцеляў, мае абходзіцца прыязьліва; бывае прыяцель бліжшы за брата.