Выслоўяў Саламонавых 31 разьдзел

Кніга выслоўяў Саламонавых
Пераклад Чарняўскага 2017 → Пераклад Яна Станкевіча

 
 

Словы Ламуэля, цара Масы, якім яго навучыла ўласная маці.
 
Словы караля Лемуеля, цяжар, што маці ягоная наўчыла яго.

Што, сыне мой? Што, сыне ўлоння майго? Што, сыне абяцанняў маіх?
 
Што, сыну мой? і што, сыну жывата майго? і што, сыну абятніцаў маіх?

Не аддавай жанчынам маёмасць сваю, ані шляхоў сваіх тым, што губяць цароў.
 
Не аддавай жанкам сілы свае ані дарогаў сваіх тым, што губяць каралёў.

Не да твару царам, о Ламуэль, не да твару царам піць віно, ані кіраўнікам — прагнуць сіцэры,
 
Не каралём, Лемуелю, не каралём піць віно ані князём хмельны напітак:

каб не выпілі яны аднойчы і не забыліся на законы, і каб не спынілі яны справу ўсіх сыноў беднага.
 
Каб, піўшы, не забыўся ўставы й не перакруціў суд усіх уцісканых.

Дай сіцэры таму, хто гіне, а віна тым, хто з горкай душою:
 
Дайце хмельны напітак гінучаму і віно тым, каторым горка на душы.

хай п’юць і хай забудуцца на беднасць сваю, і хай больш не ўспамінаюць пра смутак свой.
 
Няхай ён вып’е, і забудзецца бядноту сваю, і стомы свае ня ўспомне балей.

Ты вусны свае адкрый для нямога і для спраў усіх сыноў, што прападаюць;
 
Адчыні вусны свае дзеля немага, да суду ўсіх сыноў, што адыходзяць на вечнасьць.

адкрый вусны свае, вырашай, што справядлівае, і судзі ўбогага і беднага.
 
Адчыні вусны свае, судзі справядліва й барані справу ўбогага а беднага.

АЛЕФ. Хто знойдзе дабрадзейную жанчыну? Цана яе — значна вышэй за самацветы.
 
Малайчыну жонку хто знойдзе? бо шмат большая за пэрлы цана яе.

БЭТ. Упэўнена ў ёй сэрца мужа яе, і ён не застанецца без прыбыткаў.
 
Пэўнае да яе сэрца мужа ейнага, і прыбытку ня будзе нястачы.

ГІМЭЛЬ. Верне яму дабро, а не ліха ва ўсе дні жыцця свайго.
 
Робе дабро яму, а ня ліха, усі дні жыцьця свайго.

ДАЛЕТ. Набыла яна воўны і льну і зрабіла іх радасцю рук сваіх.
 
Шукае воўны а лёну і ахвотна робе рукамі сваімі.

ГЭ. Зрабілася яна — быццам караблём купецкім, што здалёк вязе хлеб свой.
 
Яна, як караблі купецкія, здалеку дастаўляе емя свае.

ВАЎ. І ўстае яна ўначы, і раздае ежу дамачадцам сваім і харч — служанкам сваім.
 
І ўстаець яшчэ ночы, і раздаець ежу хатнім сваім, і належнае служэбкам сваім.

ДЗАЙН. Аглядае яна зямлю — і купляе яе, з плода сваіх рук высаджвае яна вінаграднік.
 
Яна падумала праз поле й прыдбала яго; з пладоў рук сваіх яна садзе вінішча.

ГЭТ. Падперазалася моцай і ўзмацняе руку сваю.
 
Папяразуе сілаю сьцёгны свае й мацуе рукі свае.

ТЭТ. Адчувае і бачыць, што справа яе — добрая; не патухне ўначы светач яе.
 
Цеме, што тавар ейны добры; ня гасьне ночы сьветач ейны.

ЁД. Руку сваю працягвае яна да калаўрота, а пальцы яе хапаюць верацяно.
 
Выцягуе рукі свае да прасьніцы й дзяржыць верцяно ў далані сваёй.

КАФ. Далоні свае адкрывае ўбогаму, і руку сваю працягвае да беднага.
 
Адчыняе даланю сваю беднаму і выцягуе рукі свае ўбогаму.

ЛЯМЭД. Не баіцца яна снежных халадоў для дому свайго: бо ўсе яе дамачадцы апранутыя ў падвоеную вопратку.
 
Не баіцца сьнегу ля дому свайго, бо ўвесь дом ейны апранены падвойна.

МЭМ. Зрабіла яна сабе пакрывала; вісон і парфіра — убранне яе.
 
Яна тчэць сабе каберцы; шоўк а пурпура адзецьце ейнае.

НУН. У брамах муж яе вядомы, калі сядзіць са старэйшынамі зямлі.
 
Ведамны ля брамаў муж ейны, як сядзіць із старцамі зямлі.

САМЭК. Яна вырабляе муслін і прадае, і паясы прадае Ханаану.
 
Яна тчэць цянюсенькае палатно, і прадаець, і паясы Канаанянам — купцом.

АЙН. Стойкасць і прыгажосць — убранне яе, і будзе смяяцца яна ў самы апошні дзень.
 
Моц а чэсьць — адзецьце ейнае, і сьмяецца аж да апошняга дня.

ФЭ. Адкрывае вусны свае для мудрасці, і на языку яе — запавет лагоднасці.
 
Адчыняе вусны з мудрасьцяй, і навука міласьці на языццэ ў яе.

САДЭ. Аглядае яна сцежкі дому свайго, і не есць яна хлеб свой бяздзейная.
 
Яна глядзіць добра дарогаў дамовы свае і ня есьць хлеба ў дзяньгубстве.

КОФ. Устаюць дзеці яе і называюць яе самай шчаслівай, і муж яе хваліць яе:
 
Устаюць дзеці ейныя і завуць яе шчасьліваю; устаець муж ейны і хвале яе.

РЭС. «Шмат жанчын было дабрадзейных, але ты пераўзышла ўсіх на свеце».
 
«Шмат якія дачкі прыдбалі цноту, але ты перайшла ўсі іх».

СІН. Прывабнасць — падманная, а прыгажосць — пустая: тая жанчына праславіцца, што баіцца Госпада.
 
Прынаднасьць ашукная, і харашыня марная; жонка, што баіцца СПАДАРА, будзе ўхвалёна.

ТАЎ. Дайце ёй ад плода рук яе, і хай уславяць яе ў брамах справы яе.
 
Дайце ёй з пладоў рук ейных, і няхай учынкі ейныя ўхваляць яе ля брамаў.