Быццё 10 разьдзел
Быццё
Пераклад Васіля Сёмухі → Пераклад Чарняўскага 2017
Вось радавод сыноў Ноевых: Сіма, Хама і Яфэта. Пасьля патопу нарадзіліся ў іх дзеці.
Вось гэтыя нашчадкі сыноў Ноя: Сэма, Хама і Яфэта. Па патопе нарадзіліся ім сыны.
Сыны Яфэта: Гамэр, Магог, Мадай, Яван, Тувал, Мэшэх і Тырас.
Сыны Яфэта: Гамэр, Магог, Мадай, Яван, Тубал, Масок і Тыр.
Сыны Гамэравыя: Аскеназ, Рыфат і Тагарма.
Сыны Гамэра: Аскеназ, і Рыфат, і Тагарма.
Сыны Яванавыя: Эліса, Тарсіс, Кітым і Даданім.
Сыны ж Явана: Эліса і Тарсіс, Кітым і Раданім.
Ад гэтых насяліліся астравы народаў у землях іхніх, кожны паводле мовы сваёй, паводле плямёнаў сваіх, у народах сваіх.
Ад іх паходзяць жыхары ўзбярэжжаў і астравоў, падзеленыя паводле сваіх краёў і сваёй мовы, па плямёнах і паводле сваіх народаў.
Сыны Хамавыя: Хуш, Міцраім, Фут і Ханаан.
А сыны Хама: Куш, і Міцраім, і Пут, і Ханаан.
Сыны Хушавыя: Сэва, Хавіла, Саўта, Раама і Саўтэха. Сыны Раамавыя: Шэва і Дэдан.
Сыны Куша: Саба, і Хавіла, і Сабата, і Рэгма, і Сабатаха. Сыны Рэгмы: Саба і Дэдан.
Хуш спарадзіў таксама Німрода: гэты пачаў быць дужым на зямлі;
Куш быў бацькам Німрода. Ён быў першым магутным на зямлі,
ён быў дужы зьвералоў прад Госпадам; таму і кажуць: дужы зьвералоў, як Німрод, прад Госпадам.
і ён быў дужы паляўнічы перад Госпадам. Адсюль пайшла прыказка: «Як Німрод, дужы паляўнічы перад Госпадам».
Царства ягонае спачатку складалі: Вавілон, Эрэх, Акад і Халнэ, у зямлі Сэнаар.
Пачаткам валадарання яго быў Бабілон, і Эрэх, і Акад, і Хальнэ у зямлі Сэнаар.
З гэтай зямлі выйшаў Асур і пабудаваў Нінэвію, Рэхавотір, Калах
З гэтай зямлі ён выйшаў у Асірыю і пабудаваў Нініву, Рэхабот-Ір і Калах,
і Рэсэн паміж Нінэвіяю і Калахам; гэта горад вялікі.
таксама Расэн, вялікі горад між Нінівай і Калахам.
Ад Міцраіма пайшлі Лудым, Анамім, Легавім, Нафтухім,
А Міцраім быў бацькам Луда, і Анама, і Лааба, і Нафтуа,
Патрусім, Каслухім, адкуль выйшлі Філістымляне, і Кафтарым.
і Патруса, і Каслуха, і Кафтора, ад якіх паходзяць філістынцы.
Ад Ханаана нарадзіліся: Сідон, першынец ягоны, Хэт,
Ханаан жа меў сыноў: першароднага Сідона, Хета,
Евусэй, Амарэй, Гергесэй,
і Евусея, і Амарэя, Гергесея,
Эвэй, Аркей, Сінэй,
Гівея і Арацэя, Сінэя
Арвадэй, Цэмарэй і Хіматэй. Пазьней плямёны Ханаанскія расьсеяліся,
і Арадзія, Самарэя і Эматэя; і пасля таго рассеяліся народы хананеяў.
і былі межы Хананэяў ад Сідона на Герару да Газы, адсюль на Садому, Гамору, Адму і Цэваім да Лашы.
І былі межы хананеяў, калі ісці ад Сідона ў напрамку Герара аж да Газы, пакуль не дойдзеш да Садома і Гаморы, і да Адамы і Себаіма, аж да Лесы.
Гэта сыны Хамавыя, паводле плямёнаў іхніх, у землях іхніх, у народах іхніх.
Гэта нашчадкі Хама паводле іх плямёнаў і моў, земляў і народаў.
Былі дзеці і ў Сіма, бацькі ўсіх сыноў Эвеаравых, старэйшага брата Яфэтавага.
Таксама ад Сэма, бацькі ўсіх сыноў Гебэра, старэйшага брата Яфэта, нарадзіліся [нашчадкі].
Сыны Сімавыя: Элам, Асур, Арфаксад, Луд, Арам.
Сыны Сэма: Элам, і Асур, і Арпаксад, і Луд, і Арам.
Сыны Арамавыя: Уц, Хул, Гетэр і Магш.
Сыны Арама: Уц, і Гул, і Гетэр, і Мэс.
Арфаксад спарадзіў Каінана, Каінан спарадзіў Салу, Сала спарадзіў Эвэра.
А Арпаксад быў бацькам Салы, ад якога нарадзіўся Гебэр.
У Эвэра нарадзіліся два сыны; імя аднаго: Фалек, бо ў дні ягоныя зямля разьдзелена; імя брата ягонага: Ёктан.
Нарадзіліся ж у Гебэра два сыны: першаму імя Пэлег, таму што ў днях яго раздзялілася зямля, а імя брата яго Ектан,
Ёктан спарадзіў Алмадада, Шалэфа, Хацармавэта, Ераха,
Той Ектан быў бацькам Эльмадада, і Салефа, і Асармота, і Ярэ,
Гадарама, Узала, Дыклу,
і Адарама, і Узала, і Дэклы,
Авала, Авімаіла, Шэву,
і Абала, і Абімаэля, і Сабы,
Афіра, Хавілу і Ёвава. Усе гэтыя сыны Ёктанавыя.
і Афіра, і Хавіла, і Ёбаба. Яны ўсе сыны Ектана.
Селішчы іхнія былі ад Мешы да Сэфара, гары ўсходняй.
Месца іх пражывання было, калі ісці ад Мэшы аж да Сэфара, усходняй гары.
Гэта сыны Сімавыя паводле плямёнаў іхніх, паводле моваў іхніх, у землях іхніх, паводле народаў іхніх.
Яны сыны Сэма паводле плямёнаў, і моў, і земляў у народах сваіх.
Вось плямёны сыноў Ноевых, паводле радаводу іхняга, у народах іхніх. Ад іх расьсяліліся народы па зямлі пасьля патопу.
Гэта вось плямёны сыноў Ноя паводле сваяцтва і народаў сваіх. Ад іх распаўсюдзіліся народы на зямлі па патопе.
