Псалтыр 94 псалом
Псалтыр
Пераклад Чарняўскага 2017 → Пераклад Сабілы і Малахава
Бог помстаў, Госпадзе! Божа, Бог помстаў, заззяй!
Божа помсты, Ягова, Божа помсты, зазьзяй!
Узвысся Ты, што судзіш зямлю, аддай заплату пыхлівым.
Узьнімíся, Судзьдзя зямлі! Адплаці пыхлівым адплату!
Дакуль жа бязбожнікі, Госпадзе, дакуль жа бязбожнікі будуць задавацца?
Дакуль жа бязбожнікі, Ягова, дакуль жа бязбожнікі будуць весяліцца?
Будуць вымаўляць і прамаўляць нахабствы, будуць выхваляцца ўсе тыя, што чыняць несправядлівасць?
Яны ўзбураюцца, гавораць дзёрзкасьць, пышаюцца ўсе ліхадзеі.
Прыніжаюць яны, Госпадзе, народ Твой, прыгнятаюць спадчыну Тваю.
Яны топчуць народ Твой, Ягова, і яны прыгнятаюць спадчыну Тваю.
Удаву і прыхадня забіваюць і сірот мардуюць.
Яны забіваюць удаву́ і прыхадня; яны забіваюць сірот
І кажуць яны: «Не бачыць Госпад, не разумее Бог Якубаў».
і кажуць: «Ягова (гэтага) ня ба́чыць» і: «Бог Якубаў (на гэта) ня зважае.»
Зразумейце, неразумныя ў народзе, бязглуздыя, калі паразумнееце?
Апа́мятайцеся, (вы) бязглуздыя сярод народу! І вы няразумныя, калі вы паразумнееце?
Ці ж Той, Хто насадзіў вуха, не пачуе? Або Той, што сфармаваў вока, не ўбачыць?
Той, Хто стварыў вуха, няўжо ж ня пачу́е? Той, Хто стварыў вока, няўжо ж ня ўбачыць?
Ці ж Той, Хто спасцігае народы, не выкрые, Той, Хто вучыць чалавека разуменню?
Ці Той, Хто настаўляе паганаў, хíба Ён ня стане выкрываць, Той, Хто вучыць чалавека разуменьню?
Госпад ведае думкі людзей, што яны марныя.
Ягова ведае думкі чалавека, што яны марныя.
Шчасны той чалавек, якога ўдасканальваеш Ты, Госпадзе, і паводле закону Твайго навучаеш яго,
Шчасьлівы ёсьць чалавек, якога Ты навучаеш, Ягова, і якога Ты вучыш Закону Твайму,
каб даць адпачыць яму ад ліхіх дзён, пакуль выкапаюць магілу для грэшніка.
каб даць яму спакой у ліхія дні, пакуль выкапаюць дол бязбожніку;
Бо не адкіне Госпад свайго народа і не пакіне спадчыны сваёй.
бо Ягова ня адкíне народ Свой і спадку Свайго ня пакíне;
Бо суд вернецца да справядлівасці, і пойдуць за ёю ўсе, хто праўдзівага сэрца.
бо суд вернецца да справядлівасьці, і ёй пасьледуюць усе шчырыя сэрцам.
Хто стане за мяне супраць ліхадзеяў або хто стане разам са мною супраць тых, што чыняць несправядлівасць?
Хто паўстане за мяне супраць зламысьнікаў? Хто стане за мяне супраць ліхадзеяў?
Каб Госпад не ўспамог, хутка душа мая апынулася б у краіне маўклівасці.
Каб ня Ягова быў мне ўспамогай, мала заставалася, і душа мая апынулася б у сьмяротным маўчаньні.
Калі гавару я: «Нага мая хістаецца», міласэрнасць Твая, Госпадзе, падтрымлівае мяне.
Калі я кажу: «Хістаецца нага мая», дык Міласэрнасьць Твая, Ягова, падтрымлівае мяне.
Калі мноства турбот маіх у сэрцы маім, Твае суцяшэнні ўзвесяляюць маю душу.
Пры мностве трывожных думак у сэрцы маім суцяшэньні Твае напаўнялі душу́ маю Тваёй падтрымкай.
Ці ж будзе з Табою сябраваць пасад несправядлівасці, які пад выглядам прыказання творыць пакуту?
Ці можа быць зьвязаны з Табою пасад пагібелі, які намышляе бяду праз Закон?
Яны накідваюцца на душу справядлівага і асуджаюць кроў бязвінную.
Яны зьбіраюцца разам супраць душы справядлівага і асуджваюць кроў нявінаватую.
І стаўся мне Госпад абаронаю і Бог мой — скалою прыстанішча майго;
Але Ягова стаўся мне высокай цытадэльлю, Бог мой — скалой майго прытулку.
і аддасць Ён ім іх несправядлівасць і ў ліхадзейнасці іх знішчыць іх. Знішчыць іх Госпад Бог наш.
І Ён паверне на іх іхнае бяззаконьне, і зьнішчыць іх у злосьці іхнай. Зьнішчыць іх Ягова, Бог наш.
