Псалтыр 103 псалом
Псалтыр
Пераклад Чарняўскага 2017 → Пераклад Сабілы і Малахава
Давідаў. Дабраславі, душа мая, Госпада, і ўсё, што ёсць ува мне, — імя святое Яго.
Давідавы. Багаславі, душа мая, Ягову, і ўсё нутро маё Сьвятое Імя Ягонае!
Дабраславі, душа мая, Госпада ды не забывай пра ўсе даброцці Яго.
Багаславі, душа мая, Ягову, і ня забывайся на ўсе Ягоныя Дабрадзеі,
Ён адпускае ўсе твае правіннасці, Ён лечыць усе кволасці твае.
Каторы даруе ўсе твае бяззаконьні, Каторы ацаляе ўсе немачы твае,
Ён адкупае душу тваю ад загубы, Ён вянчае цябе міласэрнасцю і літасцю;
Каторы вызваляе жыцьцё тваё ад магілы, Каторы карануе цябе міласэрнасьцю і шчадротамі,
Ён напаўняе дабротамі пры жыцці цябе, аднаўляецца, як у арла, маладосць твая.
Каторы напаўняе дабром старасьць тваю, так што абнаўляе юнацтва тваё, як у арла.
Госпад, што чыніць справядлівасць і суд для ўсіх, хто церпіць крыўду,
Ягова чыніць Справядлівасьць і Суд усім прыгнечаным.
Ён даў Майсею спазнаць шляхі Свае, сынам Ізраэля — справы Свае.
Ён паказаў шляхі Свае Масею, сынам Ізраэля — Дзеі Свае.
Літасцівы і спагадны Госпад, доўгацярплівы і вельмі міласэрны.
Шчодры і міласэрны Ягова, няхуткі да гневу і багаты на міласэрнасьць.
Не бясконца Ён сварыцца ды не вечна будзе гневацца.
Ён ня вечна будзе асуджаць і ня вечна абурацца.
Не адгаджае нам паводле грахоў нашых і не помсціць нам за правіннасці нашыя.
Ён паступаў з намі ня паводля грахоў нашых і адплачваў нам ня паводля правіннасьцяў нашых;
Бо, наколькі ўзвышаецца неба над зямлёю, настолькі перавышае міласэрнасць Яго страх Яго.
бо як высока Нябёсы над зямлёй, так вялікая Міласэрнасьць Ягоная над тымі, што баяцца Яго.
Як далёкі ўсход ад захаду, так аддаляе Ён ад нас грахі нашы.
Як далёка усход ад захаду, так Ён аддалíў ад нас праступкі нашыя.
Як бацька літуецца над сынамі, так Госпад злітаваўся над тымі, што шануюць Яго.
Як лíтуецца бацька над сынамі (сваімі), так лíтуецца Ягова над тымі, хто баіцца Яго;
Бо Ён спазнаў стварэнне наша, успомніў, што мы — пыл.
бо Ён ведае склад наш, памятае, што мы — (толькі) пыл.
Быццам трава дні людскія, чалавек цвіце, як краска палявая,
Чалавек, як трава — дні ягоныя. Як кветка поля, так квітнее ён;
ледзь павее на яе вецер, і ўжо няма яе, і месца яе невядомае.
як пройдзе над ёю вецер, і ўжо няма яе, і месца ейнае ўжо ня пазна́е яе.
А міласэрнасць жа Госпадава спрадвеку па век над тымі, што шануюць Яго, а справядлівасць Яго — для сыноў сынавых.
Але Міласэрнасьць Яговы ёсьць ад вечнасьці ў вечнасьць над тымі, хто баяцца Яго, і Справядлівасьць Ягоная на сыноў сыноў,
Для тых, якія трымаюцца запавету Яго і памятаюць прыказанні Яго, каб спаўняць іх.
тых, якія трымаюць Запавет Ягоны і помняць Ягоныя наказы, каб іх выконваць.
Госпад у небе падрыхтаваў пасад Свой, і валадарыць Ён над усім светам.
Ягова ў Нябёсах усталяваў Пасад Свой, і Ягонае Каралеўства валадарыць над усім.
Дабраслаўляйце Госпада, усе анёлы Яго, моцныя магуццем, робячы па слове Яго на паслухмянасць голасу мовы Яго.
Багаслаўце Ягову, (вы) Ангелы Ягоныя, вы дужыя сілаю, выканаўцы Слова Ягонага, слухаючыя Голас Слова Ягонага.
Дабраслаўляйце Госпада, усе магуцці Яго, слугі Яго, якія выконваеце волю Яго.
Багаслаўце Ягову, усе войскі Ягоныя, служкі Ягоныя, выканаўцы Волі Ягонай.
Дабраслаўляйце Госпада, усе справы Яго, і ў кожным месцы Яго валадарання дабраславі, душа мая, Госпада!
Багаслаўце Ягову, усе творы Ягоныя, па ўсіх мейсцах Валадарства Ягонага. Багаслаў Ягову, душа мая!
