Псалтыр 103 псалом
Псалтыр
Пераклад Яна Станкевіча → Пераклад Сабілы і Малахава
Давідава. Дабраслаў, душа мая, СПАДАРА, і ўвесь нутр мой — сьвятое імя Ягонае;
Давідавы. Багаславі, душа мая, Ягову, і ўсё нутро маё Сьвятое Імя Ягонае!
Дабраслаў, душа мая, СПАДАРА і не забудзься ўсіх дабрадзействаў Ягоных;
Багаславі, душа мая, Ягову, і ня забывайся на ўсе Ягоныя Дабрадзеі,
Каторы даруе ўсі бяспраўі твае, Каторы леча ўсі хваробы твае,
Каторы даруе ўсе твае бяззаконьні, Каторы ацаляе ўсе немачы твае,
Каторы адкупляе жыцьцё твае ад зьнішчэньня, Каторы карануе цябе ласкаю а спагадлівасьцяй,
Каторы вызваляе жыцьцё тваё ад магілы, Каторы карануе цябе міласэрнасьцю і шчадротамі,
Каторы сыце дабром век твой і, як арліную, аднаўляе маладосьць тваю.
Каторы напаўняе дабром старасьць тваю, так што абнаўляе юнацтва тваё, як у арла.
Дзее справядлівасьць СПАДАР і суды ўсім уцісьненым.
Ягова чыніць Справядлівасьць і Суд усім прыгнечаным.
Ён паведаміў Масею дарогі Свае, сыном Ізраеля — учынкі Свае.
Ён паказаў шляхі Свае Масею, сынам Ізраэля — Дзеі Свае.
СПАДАР спагадлівы а ласкучынюшчы, памальны да гневу а вельмі міласэрны;
Шчодры і міласэрны Ягова, няхуткі да гневу і багаты на міласэрнасьць.
Ня будзе заўсёды гневацца ані сердаваць вечна.
Ён ня вечна будзе асуджаць і ня вечна абурацца.
Ня подле грахоў нашых зрабіў нам ані подле бяспраўяў вашых адплаціў нам;
Ён паступаў з намі ня паводля грахоў нашых і адплачваў нам ня паводля правіннасьцяў нашых;
Бо як высака неба над зямлёю, так дужая ласка Ягоная да тых, што баяцца Яго.
бо як высока Нябёсы над зямлёй, так вялікая Міласэрнасьць Ягоная над тымі, што баяцца Яго.
Як далёкі ўсход ад захаду, так здаліў ад нас выступы нашы.
Як далёка усход ад захаду, так Ён аддалíў ад нас праступкі нашыя.
Як айцец спагадае дзяцём, спагадае СПАДАР тым, што баяцца Яго;
Як лíтуецца бацька над сынамі (сваімі), так лíтуецца Ягова над тымі, хто баіцца Яго;
Бо Ён ведае ўхармаваньне нашае, помне, што пыл мы.
бо Ён ведае склад наш, памятае, што мы — (толькі) пыл.
Людзіна — як трава, дні ейныя; як кветка палявая, так яна квіціць;
Чалавек, як трава — дні ягоныя. Як кветка поля, так квітнее ён;
Бо павее вецер на яе, і яе няма, і месца ейнага не пазнаюць.
як пройдзе над ёю вецер, і ўжо няма яе, і месца ейнае ўжо ня пазна́е яе.
Але міласэрдзе СПАДАРОВА ад веку да веку да тых, што баяцца Яго, і справядлівасьць Ягоная да сыноў сыноў,
Але Міласэрнасьць Яговы ёсьць ад вечнасьці ў вечнасьць над тымі, хто баяцца Яго, і Справядлівасьць Ягоная на сыноў сыноў,
Да такіх, што дзяржаць змову Ягоную, і да тых, што памятуюць прызначаньні Ягоныя, каб паўніць іх.
тых, якія трымаюць Запавет Ягоны і помняць Ягоныя наказы, каб іх выконваць.
СПАДАР на нябёсах прыгатаваў пасад Свой, і гаспадарства Ягонае ўсе радзе.
Ягова ў Нябёсах усталяваў Пасад Свой, і Ягонае Каралеўства валадарыць над усім.
Дабраслаўце СПАДАРА, ангілы Ягоныя, дужыя сілаю, поўнячыя слова Ягонае, каб слухаць гуку слова Ягонага!
Багаслаўце Ягову, (вы) Ангелы Ягоныя, вы дужыя сілаю, выканаўцы Слова Ягонага, слухаючыя Голас Слова Ягонага.
Дабраслаўце СПАДАРА, усі войскі Ягоныя, службіты Ягоныя, што поўніце волю Ягоную!
Багаслаўце Ягову, усе войскі Ягоныя, служкі Ягоныя, выканаўцы Волі Ягонай.
Дабраслаўце СПАДАРА, усі творы Ягоныя, на ўсіх месцах дзяржавы Ягонае! Дабраслаў, душа мая, СПАДАРА!
Багаслаўце Ягову, усе творы Ягоныя, па ўсіх мейсцах Валадарства Ягонага. Багаслаў Ягову, душа мая!
