Псалтыр 116 псалом
Псалтыр
Пераклад Яна Станкевіча → Пераклад Сабілы і Малахава
Люблю, бо пачуў СПАДАР голас мой, маленьне мае,
Я люблю (Ягову), бо Ягова пачуў голас мой, маленьні мае,
Бо прыхінуў вуха Свае да мяне, затым усі дні свае буду прыгукаць Яго.
бо Ён нахіліў Вуха Сваё да мяне. Дык буду прыклікаць Яго ўва ўсе мае дні.
Сьмяротныя болі агарнулі мяне, шэолевы немарасьці стрэлі мяне; стрэлі мяне клопат а журба.
Путы сьмерці абхапілі мяне, і мукі пякельныя знайшлі мяне. Я знайшоў гора і бяду.
І гукаў я імя СПАДАРОВА: «Малю Цябе, СПАДАРУ, дай уцячы душы маёй».
Але я прыклікаў Імя Яговы: «О, Ягова, дай душы маёй уцячы!»
Ласкучынюшчы СПАДАР а справядлівы, і Бог наш спагадае.
Багадатны ёсьць Ягова і Праведны, і Бог наш спачувальны.
Крые простых СПАДАР: я пагалеў, і Ён спас мяне.
Ягова ёсьць Ахоўнік прастадушных. Я быў зьнямагаючым, але Ён выратаваў мяне.
Зьвярніся, душа мая, да супакою свайго, бо СПАДАР адплаціў табе,
Вярніся, душа мая, у спакой твой, бо Ягова зрабіў табе добрае.
Бо Ты вывальніў душу маю ад сьмерці, вочы мае ад сьлёзаў, ногі мае ад спатыканьня.
Бо Ты вызваліў душу маю ад сьмерці, вочы мае — ад сьлёзаў, нагу маю — ад спатыканьня.
Буду хадзіць перад СПАДАРОМ на землях жывых.
Я буду хадзіць перад Абліччам Яговы ў землях жывых.
Я верыў, затым я казаў: «Я вельма зьнемарашчаны».
Я веру, таму я гавару: «Я ёсьць вельмі прыніжаны».
Я сказаў у пасьпеху сваім: «Усі людзі манышы».
Я сказаў у пасьпешлівасьці маёй: «Усе людзі ілгуць».
Чым я адплачу СПАДАРУ за ўсі дабрадзействы Ягоныя імне?
Як я аддзячу Ягове за ўсе Ягоныя дабрадзеі да мяне?
Чару спасеньня падыйму і імя СПАДАРОВА прыгукаю.
Я ўзьніму келіх збаўленьня, і я прыклічу Імя Яговы.
Абятніцы свае СПАДАРУ споўню ў прытомнасьці ж усяго люду Ягонага.
Абяцаньні мае я аддам Ягове перад усім народам Ягоным.
Дарагая ў ваччу СПАДАРОВЫМ сьмерць дабрачэсьлівых Ягоных.
Дарагая ёсьць у Вачах Яговы сьмерць Ягоных сьвятых.
Малю Цябе, СПАДАРУ, бо я слуга Твой, я слуга Твой, сын служэбкі Твае; Ты распутаў путы мае.
О Ягова! я слуга Твой. Я слуга Твой, сын Тваёй служанкі. Ты разамкнуў мае кайданы.
Табе абраку аброкі падзякі і імя СПАДАРОВА буду гукаць.
Я ахвярую Табе ахвяру ўдзячнасьці, і прыклікаю Імя Яговы.
Абятніцы свае СПАДАРУ споўню ў прытомнасьці ж усяго люду Ягонага.
Абяцаньні мае я аддам Ягове перад усім народам Ягоным,
На панадворках дому СПАДАРОВАГА, сярод цябе, Ерузаліме. Галілуя!
у панадворках Дому Яговы, сярод цябе, Ярузаліме. Хваліце вы Ягову!
