Псалтыр 105 псалом
Псалтыр
Пераклад Антонія Бокуна → Пераклад Сабілы і Малахава
Слаўце ГОСПАДА, клічце імя Ягонае! Паведамляйце між народамі пра дзеі Ягоныя!
Дзякуйце Ягове. Прыклікайце Імя Ягонае. Абвяшчайце сярод народаў Учынкі Ягоныя.
Сьпявайце Яму, выслаўляйце Яго! Размаўляйце пра ўсе цудоўныя дзеі Ягоныя!
Сьпявайце Яму. Грайце Яму. Разважайце пра ўсе Ягоныя Цудоўныя Ўчынкі.
Хвалецеся імем Яго сьвятым! Няхай весяліцца сэрца тых, што шукаюць ГОСПАДА.
Хваліцеся Ягоным Сьвятым Імем. Хай радуецца сэрца тых, хто шукае Ягову.
Шукайце ГОСПАДА і сілу Ягоную, шукайце аблічча Ягонае заўсёды!
Шукайце Ягову і Сілу Ягоную. Шукайце заўсёды Аблічча Ягонае.
Узгадвайце цудоўныя дзеі Ягоныя, якія Ён зрабіў, цуды Ягоныя і прысуды вуснаў Ягоных,
Успамінайце Ягоныя Цудадзеі, якія Ён учыніў, Знакі Ягоныя і Прысуды Вуснаў Ягоных,
вы, насеньне Абрагама, слугі Ягонага, сыны Якуба, выбранца Ягонага!
насеньне Абрагамавае, слугí Ягонага, сыны Якуба, выбранцы Ягоныя!
Ён — ГОСПАД, Бог наш; над усёй зямлёй суды Ягоныя.
Ён, Ягова, ёсьць Бог наш. Па ўсёй зямлі Суды Ягоныя.
Ён памятае на вякі запавет Свой, слова, якое загадаў на тысячу пакаленьняў,
Ён памята́е вечна Свой Запавет, Слова, якое Ён запавядаў тысячам пакаленьняў,
якое заключыў з Абрагамам, і прысягу Сваю Ісааку.
(Запавет,) які Ён зрабіў з Абрагамам, і Прысягу Сваю Ісагаку.
І паставіў Якубу як пастанову, Ізраілю — як запавет вечны,
І Ён паставіў тое для Якуба, як Закон, і для Ізраэля, як Запавет вечны,
кажучы: «Табе Я дам зямлю Ханаан, [пакладу] шнур спадчыны вашай»,
кажучы: «Я дам табе зямлю Канаанскую, як адмераную частку спадчыны вашай»,
калі было ў іх людзей мала на лік, вельмі мала, калі яны жылі там
калі яны былі малалікай колькасьцю, вельмі малой, і чужынцамі ў ёй.
і пераходзілі ад народу да народу, ад [аднаго] валадарства да другога народу.
І яны вандравалі ад народу да народу, ад (аднаго) каралеўства да другога народу.
Не дазваляў Ён ніякаму чалавеку прыгнятаць іх, і караў дзеля іх валадароў,
Ён ня дазваляў ніводнаму чалавеку крыўдзіць іх, Ён дзе́ля іх дакараў каралёў:
[кажучы]: «Не чапайце памазанцаў Маіх, і прарокам Маім не рабіце благога!»
«Ня чапайце памазанцаў Маіх, і прарокам Маім ня рабіце ліха.»
І паклікаў Ён голад на зямлю, усякую падпору хлеба зламаў,
І Ён наклікаў голад на (тую) зямлю. Ён скрышыў усякую хлебную апору.
і паслаў перад абліччам іхнім чалавека, які быў прададзены як нявольнік, Язэпа.
Ён паслаў перад імі чалавека: Язэп быў прада́ны, як раб.
Зашчамілі ў кайданы ногі ягоныя, жалезам сьціснулі душу ягоную
Яны сьціснулі ягоныя ногі ў кайданы; у жалеза ўвайшла душа ягоная,
аж да часу, калі выйшла справа ягоная, слова ГОСПАДА ачысьціла яго.
да часу, калі прыйшло Слова Ягонае, Слова Яговы зьявіла чыстасьць ягоную.
Валадар паслаў, каб звольніць яго; той, што пануе над народамі, вызваліў яго,
Кароль паслаў і вызваліў яго, валадар народаў даў яму волю.
паставіў яго гаспадаром над домам сваім і [чалавекам], што пануе над усім даброцьцем ягоным,
Ён паставіў яго гаспадаром над домам сваім і дзяржаўцам над усім сваім валадарствам,
каб скіроўваў князёў ягоных паводле [рашэньня] душы сваёй, і старшыняў ягоных вучыў мудрасьці.
каб ягоных магнатаў настаўляў паводля розуму свайго і вучыў мудрасьці ягоных старшыняў.
І прыйшоў Ізраіль у Эгіпет, і Якуб пасяліўся ў зямлі Хама.
І прыйшоў Ізраэль у Ягіпет. І асеў Якуб у зямлі Хама.
І [Бог] зрабіў вельмі плодным народ Свой, і зрабіў яго мацнейшым за прыгнятальнікаў ягоных.
І Ён зрабіў народ Свой надзвычайна плодным, і зрабіў яго мацнейшым за ўціскальнікаў ягоных.
Зьмяніў сэрца іхняе, каб ненавідзелі народ Ягоны, каб змовіліся супраць слугаў Ягоных.
Ён павярнуў іхнае сэрца нянавідзіць Ягоны народ, і чыніць злую хітрасьць супраць слугаў Ягоных.
Ён паслаў Майсея, слугу Свайго, Аарона, якога выбраў Сабе.
Ён паслаў Масея, слугу Свайго, (і) Агарона, якога Ён абраў.
Ён зьявіў праз іх знакі Свае і цуды Свае ў зямлі Хама.
Яны выклалі сярод іх Словы Знакаў Ягоных і Цудадзеі ў зямлі Хама.
Ён паслаў цемру, і зрабілася цёмна, і не маглі працівіцца слову Ягонаму.
Ён паслаў цемру і зрабіў цемень, і яны (Масей і Агарон) былі ня супраціўнымі Слову Ягонаму.
Ён перамяніў воды іхнія ў кроў, і памерлі рыбы іхнія.
Ён ператварыў іхныя воды ў кроў і замарыў іхную рыбу.
Напоўнілася зямля іхняя жабамі, нават у спальнях валадароў іхніх.
Зямля іхная зараілася ад жабаў аж да гмахаў іхных каралёў.
Сказаў, і наляцелі мухі і камары ў-ва ўсіх межах іхніх.
Ён сказаў, і зьявілася мноства ўсякіх (кусючых) кузурак і камароў ва ўсіх іхных межах.
Ён даў ім [замест] дажджу град, полымя агню на зямлю іхнюю.
Замест дажджу Ён даў ім град, (і) агонь палымяны ў зямлі іхнай,
Пабіў вінаградныя лозы іхнія і дрэвы фігавыя, і паламаў дрэвы ў межах іхніх.
і Ён пабіў іхныя вінаград і хвігавыя дрэвы і паламаў дрэвы ў межах іхных.
Сказаў, і прыйшла саранча, і хрушчоў безьліч,
Ён сказаў, і прыйшла саранча і безьліч вусеняў,
і яны паелі ўсе расьліны ў зямлі іхняй, і паелі плады палёў іхніх.
і яны пажэрлі ўсе травы ў зямлі іхнай і пажэрлі (увесь) плод іхных палёў.
Ён пабіў усіх першародных у зямлі іхняй, зачаткі ўсёй сілы іхняй.
І Ён пабіў усіх першародных у іхнай зямлі, пачаткі ўсёй сілы іхнай.
А іх вывеў са срэбрам і золатам, і не было ў каленах іхніх нядужага.
І Ён вывеў іх са срэбрам і золатам, і ня было сярод іхных плямёнаў ніводнага хворага.
Радаваўся Эгіпет з выхаду іхняга, бо ахапіў іх страх перад імі.
Узрадаваўся Ягіпет, што яны выйшлі, бо зьняў яго страх перад імі.
Ён хмару разгарнуў, як заслону, і агонь, каб ноч асьвятляць.
Ён прасьцёр перад імі воблака, як покрыў, і агонь, сьвяціць ноччу.
Зажадалі, і прывёў перапёлак, і хлебам нябесным насычаў іх.
Ён (народ) прасіў, і Ён (Ягова) прывёў (ім) перапёлак. І хлебам зь нябёсаў Ён накарміў іх.
Ён рашчапіў скалу, і лінулі воды, і ракой пацяклі па сухой [зямлі].
Ён адчыніў скалу, і пацяклі воды; яны пацяклі ракой у сухія мясьціны; —
Бо Ён узгадаў слова сьвятое Сваё да Абрагама, слугі Свайго,
бо Ён памятаў Сваё Сьвятое Слова (да) Абрагама, слугі Свайго.
і вывеў народ Свой у радасьці, выбранцаў Сваіх — са сьпяваньнем.
І Ён вывеў народ Свой у радасьці, з урачыстай радасьцяй Сваіх выбранцаў.
І даў ім зямлю народаў, і набытак народаў успадкаемілі яны,
І Ён даў ім землі паганаў, і яны заўладалі тым, што народы прыдбалі працай,
каб захоўвалі пастановы Ягоныя і законаў Ягоных трымаліся. Альлелюя!
каб яны трымаліся Статутаў Ягоных і Законы Ягоныя захоўвалі. Хваліце вы Ягову!
