Псалтыр 136 псалом
Псалтыр
Пераклад Антонія Бокуна → Пераклад Сабілы і Малахава
Слаўце ГОСПАДА, бо Ён добры, бо на вякі міласэрнасьць Яго!
Дзякуйце Ягове, бо (Ён) ёсьць добры, бо Ягоная Міласэрнасьць (трывае) у вяках вякоў.
Слаўце Бога багоў, бо на вякі міласэрнасьць Яго!
Дзякуйце Богу багоў, бо Ягоная Міласэрнасьць (трывае) у вяках вякоў.
Слаўце Пана паноў, бо на вякі міласэрнасьць Яго!
Дзякуйце Госпаду валадароў, бо Ягоная Міласэрнасьць (трывае) у вяках вякоў.
Таго, Які Сам робіць цуды вялікія, бо на вякі міласэрнасьць Яго:
Таму, Які робіць вялікія Цуды, Ён адзін, бо Ягоная Міласэрнасьць (трывае) у вяках вякоў.
Таго, Які неба ўчыніў з разуменьнем, бо на вякі міласэрнасьць Яго;
Таму, Які нябёсы стварыў Мудрасьцю, бо Міласэрнасьць Ягоная (трывае) у вяках вякоў.
Таго, Які зямлю расьцягнуў па-над водамі, бо на вякі міласэрнасьць Яго;
Які прасьцягнуў зямлю над водамі, бо Ягоная Міласэрнасьць (трывае) у вяках вякоў,
Таго, Які ўчыніў сьвяцілы вялікія, бо на вякі міласэрнасьць Яго;
Таму, Які стварыў сьвяцілы вялікія, бо Міласэрнасьць Ягоная (трывае) у вяках вякоў,
сонца, каб кіравала днём, бо на вякі міласэрнасьць Яго;
сонца для кіраваньня днём, бо Міласэрнасьць Ягоная (трывае) у вяках вякоў,
месяц і зоркі, каб кіравалі ноччу, бо на вякі міласэрнасьць Яго;
месяц і зоркі для кіраваньня ноччу, бо Міласэрнасьць Ягоная (трывае) у вяках вякоў,
Таго, Які пабіў Эгіпет у першародных ягоных, бо на вякі міласэрнасьць Яго;
Таму, Які нанёс сьмертаносны ўдар Ягіпту праз сьмерць (усяго) ягонага першароднага, бо Міласэрнасьць Ягоная (трывае) у вяках вякоў,
і вывеў Ізраіля спасярод яго, бо на вякі міласэрнасьць Яго;
і вывеў Ізраэля зь ягонага (Ягіпту) асяродзьдзя, бо Міласэрнасьць Ягоная (трывае) у вяках вякоў,
рукою дужаю і рамяном узьнятым, бо на вякі міласэрнасьць Яго;
Далоньню магутнай і працягнутай Рукой, бо Міласэрнасьць Ягоная (трывае) у вяках вякоў,
Таго, Які Мора Чырвонае расьсек, бо на вякі міласэрнасьць Яго;
Таму, Які Чырвонае мора расьсек на (дзьве) часткі, бо Міласэрнасьць Ягоная (трывае) у вяках вякоў,
і правёў Ізраіля пасярод яго, бо на вякі міласэрнасьць Яго;
і правёў Ізраэля пасярод яго, бо Міласэрнасьць Ягоная (трывае) у вяках вякоў,
і кінуў фараона і войска ягонае ў Мора Чырвонае, бо на вякі міласэрнасьць Яго;
і хвараона і ягонае войска ськінуў у мора Чырвонае, бо Міласэрнасьць Ягоная (трывае) у вяках вякоў,
Таго, Які вёў народ Свой праз пустыню, бо на вякі міласэрнасьць Яго;
Таму, Які народ Свой правёў праз пустэльню, бо Міласэрнасьць Ягоная (трывае) у вяках вякоў.
Таго, Які пабіў валадароў вялікіх, бо на вякі міласэрнасьць Яго;
Таму, Які пабіў вялікіх каралёў, бо Міласэрнасьць Ягоная (трывае) у вяках вякоў,
і забіў валадароў слаўных, бо на вякі міласэрнасьць Яго;
і пазабіваў знакамітых каралёў, бо Міласэрнасьць Ягоная (трывае) у вяках вякоў,
Сыгона, валадара Амарэйскага, бо на вякі міласэрнасьць Яго;
Сігона, караля амарэяў, бо Міласэрнасьць Ягоная (трывае) у вяках вякоў,
і Ога, валадара Башану, бо на вякі міласэрнасьць Яго;
і Ога, караля Башану, бо Міласэрнасьць Ягоная (трывае) у вяках вякоў,
і аддаў зямлю іхнюю ў спадчыну, бо на вякі міласэрнасьць Яго;
і зямлю іхную аддаў на спадак, бо Міласэрнасьць Ягоная (трывае) у вяках вякоў,
у спадчыну Ізраілю, слузе Свайму, бо на вякі міласэрнасьць Яго;
на спадак Свайму слузе Ізраэлю, бо Міласэрнасьць Ягоная (трывае) у вяках вякоў,
Таго, Які ў паніжэньні нашым успомніў пра нас, бо на вякі міласэрнасьць Яго;
Які ўспомніў пра нас у паніжэньні нашым, бо Міласэрнасьць Ягоная (трывае) у вяках вякоў,
і выратаваў нас ад прыгнятальнікаў нашых, бо на вякі міласэрнасьць Яго;
і Ён выратаваў нас ад ворагаў нашых, бо Міласэрнасьць Ягоная (трывае) у вяках вякоў,
Таго, Які дае хлеб усякаму целу, бо на вякі міласэрнасьць Яго.
Які дае ежу ўсякаму целу, бо Міласэрнасьць Ягоная (трывае) у вяках вякоў,
Слаўце Бога нябёсаў, бо на вякі міласэрнасьць Яго!
дзякуйце Богу нябёсаў, бо Міласэрнасьць Ягоная (трывае) у вяках вякоў.
