Господь Богъ, доконавъ делъ Своихъ в шести днехъ, отпочинулъ дня седмаго и освятилъ и. О вчинении раю роскошей и о створении Евги с кости Адамовы.
1 Тако совершишеся небо и земля и все украшение ихъ.
2 И доконалъ ест Богъ дня шестаго дело Свое, еже сътворилъ, и отпочинулъ дня седмаго от всехъ делъ Своих, еже соделал,
3 и благославилъ день седмый и посвятил и, яко в немъ былъ престалъ от всехъ делъ Своихъ, ихже сотворилъ Богъ, да бы чинилъ.
4 Сия суть бытья небеси и земли, внегда сотворена суть в день, в оньже учини Богъ небо и землю,
5 и всяку хворостину польну прежде, нежели выхожала на земли, и кажную былину странъ первей, нежели ест дала плод свой; яко не одождил былъ Господь Богъ на землю, и человек не был, делая земли,
6 но источникъ выхожаше з земли, намочая все лице ея.
7 Создал же естъ Господь Богъ человека, вземъ персть от земли, и водхнул в лице его дыхание живота, и бысть человек в душу живу.b
8 И насадил былъ Господь Богъ рай кохания изначала, в немже поставилъ человека, егоже былъ создалъ.
9 И изведе Господь Богъ от земли всяко древо красно к позрению и добро ко укушению, древо теже живота посреди Раю и древо умения доброго и злого.
10 И потокъ исходяше з места кохания, намочая рай, онже оттоле розлучашеся во четыри реки главные.c
11 Имя единой — Фисон, сия есть, иже обыходить всю землю Евилатскую; ту родится злато,
12 и злато земли тое избранно есть. И тамо знайдують бделиумъ и камень онихинъ.
13 Имя же реце второй — Геонъ, сия есть обыходяще всю землю Муринскую.
14 Имя пакъ реки третее — Тигръ, сия идеть прямо Асиряномъ. Река же четвертая — Ефратъ.
15 И поялъ естъ Господь Богъ человека и поставилъ и в раи кохания делати и хранити и.
16 И заповедалъ ему, глаголя: «От всякаго древа райскаго ежъ,
17 от древа же познания доброго и злого да не яси, в оньже убо день ести будеши от него, смертию умреши».
18 И рече Господь Богъ: «Недобро быти человеку единому; учинимо жъ помощъ подобну ему».
19 Со здавши же Господь Богъ от земли всехъ зверей земныхъ и всех птиць небесных,d приведе е ко Адаму, абы ихъ виделъ и именовалъ; всяко бо животное якоже назъвалъ Адамъ, то естъ имя его.
20 И именовалъ ест Адамъ кажное животное и всякую птицу небесную, и все звери земныи, Адамови же не знайдеся помощъникъ, подобенъ ему.
21 И пустилъ естъ Господь Богъ дремоту на Адама. И егда уснулъ, вынялъ едину кость от ребръ его, и наполни плотию в нея место.e
22 И созда Господь Богъ кость, юже вынялъ от Адама, в жену, и приведе ю ко Адаму.
23 И рече Адамъ: «Сия ныне кость от костей моихъ и плоть от плоти моея; сия наречеться мужатая, понеже от мужа взята есть».
24 Сего для оставить человекъ отца своего и матерь и прилепится жене своей, и будут два во плоти единой.f
25 И беста оба нага, Адамъ и жена его, и не стыдестася.
a Выхад, 20[:8-11]; Да Габрэяў, 4[:4].
b 1-е да Карынфянаў, 15[:45]; Іова, 33[:4]; Псалом 118[:25].
c Ісуса, сына Сіраха, 24[:27-29].
d Псалом 8[:8-9].
e 1-е да Карынфянаў, 11[:12]; Ісуса, сына Сіраха, 17[:3].
f Мацвея, 19[:5]; Марка, 10[:8]; Да Эфесцаў, 5[:31].
Знайшлі памылку ў тэксце? Вылучыце яе і націсніце:
Ctrl + Enter
Книги Бытья, 2 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.