Псалтыр 2 псалом

Псалтыр
Пераклад Сабілы і Малахава → Пераклад Чарняўскага 2017

 
 

Чаму бунтуюцца народы, і людзі задумляюць марнае?
 
Чаму бунтуюцца плямёны і народы задумваюць марнае?

Паўстаюць каралі зямлі, і князі зьбіраюцца супольна супраць Яговы і супраць Памазанца Ягонага:
 
Узнімаюцца цары зямлі і князі збіраюцца супольна супраць Госпада і супраць Намашчэнца Яго:

Парве́ма іхныя кайданы і путы іхныя скіньма зь сябе!
 
«Парвём кайданы іх, і ярмо іх скінем з сябе!»

Той, што сядзіць у Небе, сьмяецца: Госпад пазьдзекуецца над імі.
 
Той, што жыве ў нябёсах, пасмяецца з іх, Госпад паздзекуецца з іх,

Тады кажа да іх у гневе Сваім і ярасьцю Сваёй пужае іх:
 
а потым скажа ім у гневе Сваім і ярасцю Сваёй узрушыць іх:

Гэта Я пасадзіў Караля Майго на Сыёне, гары Маёй сьвятой!
 
«Гэта Я паставіў Валадара Свайго на Сіёне, на святой гары Маёй!

Я абвяшчаю пастанову: Ягова сказаў Мне: Ты Мой Сын, сягоньня Я спарадзіў Цябе!
 
Абвяшчу прысуд Госпадаў. Бо Ён сказаў мне: “Ты — сын Мой, Я сёння нарадзіў цябе.

Прасі ў Мяне, і Я даю Табе народы ў спадчыну і межы зямлі ў валаданьне Табе.
 
Прасі Мяне, і Я дам табе ў спадчыну народы і на ўласнасць Табе зямныя прасторы.

Паліцай зялезнай будзеш кіраваць імі, нібы глінянае начыньне скрышыш.
 
Валадарыць будзеш імі кіем жалезным, нібы глінянае начынне скрышыш іх”».

Дык цяпер, каралі, будзьце кемлівымі, навучэцеся судзьдзі зямлі!
 
А цяпер, цары, зразумейце, уцяміце [тыя], што выносіце прысуд на зямлі:

Служыце Ягове са страхам і радуйцеся з дрыжаньнем.
 
Служыце Госпаду са страхам і радуйцеся Яму з дрыжаннем,

Шануйце чысьціню, каб Ён (Ягова) ня загневаўся, і каб вы ня загінулі ў дарозе, бо няўзабаве ўзгарыцца гнеў Ягоны! Багаславёныя ўсе, што спадзяюцца на Яго.
 
Ушануйце Сына, каб не загневаўся і каб не папрападалі ў дарозе, калі ўзгарыцца неўзабаве гнеў Яго. Шчасныя ўсе, якія цвёрда спадзяюцца на Яго.