Выслоўяў Саламонавых 4 разьдзел
Кніга выслоўяў Саламонавых
Пераклад Васіля Сёмухі → Пераклад Чарняўскага 2017
Слухайце, дзеці, настаўленьня бацькавага, і зважайце, каб навучыцца розуму;
Слухайце, дзеці, бацькоўскае настаўленне і слухайце, каб навучыцца разважлівасці;
бо я дам вам добрую навуку. Не адкідайце наказу майго.
я дам вам добрае навучанне, не пагарджайце запаветам маім.
Бо і я быў сын у бацькі майго, пяшчотна любімы і адзіны ў маці маёй.
Бо і я быў сынам бацькі майго, пешчаны і адзіны — у маці маёй;
І ён вучыў мяне і казаў мне: хай будуць у сэрцы тваім словы мае; захоўвай наказы мае і жыві.
вучыў ён мяне і казаў мне: «Хай прымае сэрца тваё словы мае, беражы настаўленні мае — і будзеш жыць.
Здабывай мудрасьць, набывай розум; не забывай гэтага і ня цурайся слоў маіх, а кіруйся імі!
Набывай мудрасць, набывай разважлівасць, не забывайся і не ўхіляйся ад слоў вуснаў маіх.
Не адкідай яе, і яна будзе ахоўваць цябе; любі яе, і яна будзе цябе берагчы.
Не пакідай яе, і яна зберажэ цябе, любі яе, а яна выратуе цябе.
Аснова мудрасьці: набывай мудрасьць і за ўсё, што маеш, набывай розум.
Пачатак мудрасці: валодай мудрасцю і набывай разважлівасць ва ўсякай тваёй маёмасці.
Высока цані яе, і яна ацэніць цябе; яна акрые славай цябе, калі ты прыгорнеш яе;
Набывай яе, і яна ўзвысіць цябе, яна праславіць цябе, калі будзеш любіць яе.
ускладзе на галаву тваю прыгожы вянок, падаруе табе цудоўны вянок.
Ускладзе на галаву тваю вянок ласкі, абароніць цябе ўслаўленым вянцом».
Слухай, сыне мой, і прымі словы мае, — і памножацца гады твайго жыцьця.
Слухай, сыне мой, і ўспрымай словы мае, каб памножыліся гады жыцця твайго.
Я паказваю табе шлях мудрасьці, вяду цябе па сьцежках простых.
Паказаў я табе шлях мудрасці; вяду цябе сцежкамі справядлівымі,
Калі пойдзеш, крокам тваім ня будзе завады, і калі пабяжыш, не спатыкнешся.
калі ўступіш на іх, не будуць сціснутыя крокі твае, і, калі пабяжыш, не сустрэнеш перашкоду.
Моцна трымайся наказу, не адкідай, захоўвай яго; бо ён — жыцьцё тваё.
Трымай настаўленне і не адпускай яго; беражы яго, бо яно — жыццё тваё.
Ня выходзь на сьцежку бязбожнікаў, і не хадзі па дарозе ліхіх;
Не ўступай на сцежкі бязбожнікаў і не хадзі па дарозе ліхіх людзей.
пакінь яе, не хадзі ёю, ухіляйся ад яе і праходзь міма.
Пазбягай яе і не хадзі па ёй; ухіляйся і адступіся ад яе.
бо яны не заснуць, пакуль ня ўчыняць ліхога; прападзе сон у іх, пакуль яны не давядуць каго да падзеньня;
Бо не спяць яны, пакуль благога не зробяць, і сон іх не ахоплівае, калі не дадуць камусьці падножку.
бо яны ядуць хлеб беззаконьня і п’юць віно рабунку.
Бо ядуць яны хлеб бязбожнасці і п’юць віно несправядлівасці.
Сьцежка праведных — як сьвяціла прамяністае, якое болей і болей сьвятлее да поўнага дня.
А сцежка справядлівых — быццам святло ззяючае ўзыходзіць і расце аж да поўнага дня.
А шлях бязбожных — як цемра; яны ня ведаюць, на што спатыкнуцца.
Шлях бязбожнікаў — цёмны, і не ведаюць яны, дзе зваляцца.
Сыне мой! слоў маіх слухайся, і да прамоваў маіх нахілі тваё вуха;
Сыне мой, слухай уважліва размовы мае і схіляй вуха сваё да размоў маіх;
хай не адыдуць яны ад вачэй тваіх; захоўвай іх усярэдзіне сэрца твайго:
хай не знікаюць яны з вачэй тваіх, беражы іх у глыбіні сэрца свайго;
бо яны жыцьцё таму, хто знайшоў іх, і ацаленьне ўсяму яго целу.
бо яны — жыццё для тых, хто знаходзіць іх, і здароўе — для ўсяго цела.
Больш за ўсё запаветнае захоўвай сэрца тваё; бо ў ім — крыніца жыцьця.
Усялякім наглядам сцеражы сэрца сваё, бо з яго жыццё ўзнікае.
Адкінь ад сябе ілжывасьць вуснаў, і круцельства языка адхісьні ад сябе.
Адхілі ад сябе крывадушны язык, і хай будуць далёка ад цябе шкодныя вусны.
Вочы твае хай наперад глядзяць, і позірк твой хай скіраваны будзе перад табою.
Вочы твае хай глядзяць прама, а павекі хай накіраваны будуць перад сабой.
Абдумай сьцежку назе тваёй, і ўсе дарогі твае хай будуць пэўныя.
Сачы за сцежкай ног тваіх, і ўсе дарогі твае будуць цвёрдыя.
Ня ўхіляйся ні направа, ні налева; адвядзі нагу тваю ад ліхога.
Не паварочвай ані направа, ані налева, беражы нагу сваю ад ліха.
