Быццё 40 разьдзел

 

 

Пасьля гэтага чашнік цара Егіпецкага і пекар правінаваціліся перад гаспадаром сваім, царом Егіпецкім.

 

І надарылася пасля падзеяў гэтых: завінаваціліся найвышэйшы падчашнік і галоўны пекар перад гаспадаром сваім, царом Егі́пта.

І ўгневаўся фараон на двух царадворцаў сваіх, на галоўнага чашніка і на галоўнага пекара,

 

І разгневаўся фараон на двух еўнухаў сваіх, на найвышэйшага падчашніка і на галоўнага пекара,

і аддаў іх пад варту ў дом да начальніка целаахоўцаў, у цямніцу, у тое месца, дзе ўвязьнены быў Язэп.

 

і ўкінуў іх у вязніцу да цямнічніка, у месца тое, куды быў адведзены Язэ́п.

Начальнік целаахоўцаў прыставіў да іх Язэпа, і ён служыў ім. І прабылі яны пад вартаю некаторы час.

 

І паставіў галоўны цямнічнік1 да іх Язэ́па, каб быў ля іх, і былі яны праз дзень пад гэтай вартай.

Аднаго разу чашніку і пекару цара Егіпецкага, увязьненым у цямніцы, бачыліся сны, кожнаму свой сон, абодвум у адну ноч, кожнаму сон адмысловага значэньня.

 

І ўбачылі абодва сон, кожны асобны сон, у адну ноч кожны ўбачыў свой сон, найвышэйшы падчашнік і галоўны пекар цара Егі́пта, якія былі ў вязніцы.

І прыйшоў да іх Язэп раніцай, убачыў іх, і вось, яны сумеліся.

 

Увайшоў жа да іх Язэ́п на дасвецці і ўбачыў іх, і былі збянтэжанымі.

І спытаўся ён у царадворцаў фараонавых, якія былі зь ім у доме гаспадара ягонага пад вартаю, кажучы: чаго ў вас сёньня журботныя твары?

 

І спытаўся еўнухаў фараона, якія былі з ім пад вартай гаспадара яго, кажучы: “Чаму твары вашыя панылыя сёння?”

Яны сказалі яму: нам прысьніліся сны, а растлумачыць іх няма каму. Язэп сказаў ім: ці не ад Бога тлумачэньні? раскажэце мне.

 

Яны ж адказалі яму: “Сны ўбачылі мы, але не ведаем тлумачэння іх”. Сказаў жа ім Язэ́п: “Ці ж не праз Бога будзе іх тлумачэнне?2 Апавядзіце мне”.

І расказаў галоўны чашнік Язэпу сон свой і сказаў яму: мне сьнілася, вось вінаградная лаза перад мною;

 

І апавядаў найвышэйшы падчашнік свой сон Язэ́пу, і казаў: “У сне маім была вінаградная лаза перад абліччам маім,

на лазе тры галінкі; яна разьвілася, паказаліся на ёй кветкі, вырасьлі і пасьпелі на ёй ягады;

 

а на вінаграднай лазе тры сцябліны, і яны збыткавалі завязаннем парасткаў, даспеленых гронкаў вінаграду.

і чаша фараонавая ў мяне ў руцэ; я ўзяў ягад, выціснуў іх у чашу фараонавую і падаў чашу ў руку фараону.

 

І келіх фараона ў руцэ маёй. І ўзяў я вінаградную гронку, і выціснуў яе ў келіх, і падаў келіх у рукі фараону”.

І сказаў яму Язэп: вось тлумачэньне яго: тры галінкі — гэта тры дні;

 

І сказаў яму Язэ́п: “Такое тлумачэнне яго: тры сцябліны — гэта тры дні.

праз тры дні фараон узьнясе галаву тваю і верне цябе на месца тваё, і ты падасі чашу фараонавую ў руку яму, па ранейшай завядзёнцы, калі ты быў у яго чашнікам;

 

Яшчэ тры дні — і ўзгадае фараон кіраванне тваё, і адновіць цябе на найвышэйшым падчашніцтве тваім, і падасі келіх фараону ў руку яго паводле кіравання твайго папярэдняга, калі быў чашнікам,

спамяні ж пра мяне, калі табе будзе добра, і зрабі мне дабрачынства, і нагадай пра мяне фараону, і выведзі мяне з гэтага дома;

 

але ўзгадай мяне з-за сябе самога, калі добра табе станецца, і зробіш дзеля мяне міласць, калі прыгадаеш пра мяне фараону, і выведзеш мяне з крэпасці гэтай,

бо я ўкрадзены зь зямлі Габрэяў; а таксама і тут нічога не зрабіў, за што б кідаць мяне ў цямніцу.

 

бо падступна выкрадзены быў з зямлі гебра́яў, і тут не зрабіў нічога, але ўкінулі мяне ў капаніцу гэтую”.

Галоўны пекар убачыў, што растлумачыў ён добра, і сказаў Язэпу: мне таксама сьнілася: вось на галаве ў мяне тры кашы кратаваныя;

 

І ўбачыў галоўны пекар, што праўдзіва ён растлумачыў, і сказаў Язэ́пу: “І я пабачыў сон, і мне ўяўляліся тры кошыкі хлябоў, пастаўленыя мне на галаву.

у верхнім кашы ўсялякая ежа фараонавая, вырабы пекара, і птушкі дзяўблі яе з каша на галаве маёй.

 

У верхнім жа кошыку ўсялякіх гатункаў вырабы пекарскія, якія ўладны фараон спажывае, ды птушкі нябёсныя дзяўблі гэта з верхняга кошыка на галаве маёй”.

І адказваў Язэп і сказаў: вось тлумачэньне яго: тры кашы — гэта тры дні.

 

Адказваючы ж, Язэ́п паведаміў яму: “Такое тлумачэнне яго: тры кошыкі — гэта тры дні.

праз тры дні фараон здыме зь цябе галаву тваю і павесіць цябе на дрэве, і птушкі будуць дзяўбці плоць тваю зь цябе.

 

Праз тры дні пазбавіць цябе фараон галавы тваёй, і павесіць цябе на дрэве, і будуць дзяўбці цела тваё птушкі нябёсныя”.

На трэці дзень, дзень народзінаў фараонавых, учыніў ён гасьціну ўсім слугам сваім і ўспомніў пра галоўнага чашніка і галоўнага пекара сярод слуг сваіх;

 

Надарылася ж на трэці дзень, быў дзень народзінаў фараона, і ладзіў ён застолле для ўсіх слугаў сваіх. І ўзгадаў кіраванне найвышэйшага падчашніка і кіраванне галоўнага пекара спасярод слугаў сваіх.

і вярнуў галоўнага чашніка на ранейшае месца, і ён падаў чашу ў руку фараону;

 

І аднавіў найвышэйшага падчашніка ў кіраванні яго, і падаў той келіх у руку фараону.

а галоўнага хлебадара павесіў на дрэве, як растлумачыў ім Язэп.

 

Галоўнага ж пекара павесіў, як патлумачыў ім Язэ́п.

І ня ўспомніў галоўны чашнік пра Язэпа, а забыў яго.

 

Ды не ўзгадаў найвышэйшы падчашнік Язэ́па, бо забыўся на яго.