Ёва 22 разьдзел
Кніга Ёва
Пераклад Васіля Сёмухі → Пераклад Яна Станкевіча
І адказваў Таманіцянін і сказаў:
І адказаў Еліфаз Феманянін, і сказаў:
хіба можа чалавек рабіць карысьць Богу? Разумны робіць карысьць сабе самому.
«Ціж можа чалавек быць карысны Богу? Пэўне мудры карысны сабе самому.
Якая прыемнасьць Усеўладнаму з таго, што ты праведны? І ці будзе Яму выгода з таго, што ты трымаеш дарогі твае ў беззаганнасьці?
Што за прыемнасьць Усемагучаму, калі ты справядлівы, альбо ці ё карысьць, што ты дзяржыш дарогі свае беззаганнымі?
Няўжо Ён, баючыся цябе, уступіць з табою ў спаборніцтва, пойдзе судзіцца з табою?
Ці із страху цябе Ён гане цябе і ўходзе на суд із табою?
Праўда, злосьць твая вялікая, і беззаконьням тваім няма краю.
Хіба нягоднасьць твая вялікая, і намяш канца бяспраўю твайму.
Праўда, ты браў заклад у братоў тваіх ні за што і з паўголых здымаў вопратку.
Ты браў заклады ад брата свайго ні зашта, і адзецьце ў голых ты здыймаў.
Стомленаму смагаю не падаваў вады напіцца і галоднаму адмаўляўся даць хлеба;
Усьмягламу не падаваў вады напіцца й галоднаму адмаўляў хлеба;
а чалавеку дужаму ты даваў зямлю, і заможны сяліўся на ёй.
А чалавеку плячыстаму — яму зямля, і важны жывець на ёй.
Удоваў ты адсылаў ні з чым і сіротаў пакідаў з пустымі рукамі.
Удовы ты адпушчаў з пустымі рукамі, і плячукі сіротаў мяжджуліў.
За тое вакол цябе петлі, і скалануў цябе нечаканы жах,
Затое сілы навокал цябе, і спалохае цябе жах неўспадзеўкі.
альбо цемра, у якой ты нічога ня бачыш, і мноства водаў пакрыла цябе.
Або цемнь, што ты ня бачыш, і паводка пакрывае цябе.
Ці ня вышэй за нябёсы Бог? паглядзі ўгору на зоркі, як яны высока!
Ці ня высака на нябёсах Бог? Бачыш найвышшыя гвезды, як яны высака!
І ты кажаш: што ведае Бог? ці можа Ён судзіць праз цемру?
Затым ты кажаш: "Што ведае Бог? можа Ён судзіць пераз глыбокую цемнь?
Хмары — заслона Ягоная, так што Ён ня бачыць, а ходзіць толькі па нябесным коле.
Таўстыя булакі закрываюць Яго, так што Ён ня бача, а ходзе па скляпеньню нябёсным".
Няўжо ты трымаешся шляху старажытных, па якім ішлі людзі беззаконныя,
Нягож ты дзяржышся вечнага гасьцінца, па каторым людзі несправядлівыя йшлі?
якія раней часу былі зьнішчаны, калі вада разьлілася пад аснову іхнюю?
Яны былі адцяты без пары, іхны под падмыла рака,
Яны казалі: адыдзі ад нас! І што зрабіў ім Усеўладны?
Каторыя казалі Богу: "Адвярніся ад нас" і "Што можа Ўсемагучы зрабіць нам?"
А Ён напаўняў дамы іхнія дабром. Але рада бязбожных будзь далёка ад мяне!
А Ён паўніў дамы іхныя дабром. Але рада нягодных далёка ад мяне.
Бачылі праведнікі і радаваліся, і беззаганны сьмяяўся зь яго:
Бачылі справядлівыя й цешыліся, нявінны насьміхаўся зь іх:
вораг наш зьнішчаны, а што засталося пасьля іх, тое пажэр агонь.
"Ці не адцяты праціўнікі нашы, і пакіненае імі пажэрла цяпло?"
Зблізіся ж зь Ім — і будзеш спакойны: праз гэта прыйдзе да цябе дабро.
Пазнаёмся ж ізь Ім і будзеш у супакою, ад гэтага прыйдзе да цябе дабро.
Прымі з вуснаў Ягоных закон і пакладзі слова Ягонае ў сэрца тваё.
Вазьмі ж із вуснаў Ягоных права і палажы словы Ягоныя ў сэрца свае.
Калі ты зьвернешся да Ўсеўладнага, дык зноў уладзішся, адвядзеш беззаконьне ад намёта твайго
Калі ты зьвернешся да Ўсемагучага, то будзеш збудаваны, калі аддаліш несправядлівасьць ад будану свайго.
і будзеш кідаць у пыл бліскучы метал, і ў каменьне патокаў — золата Афірскае.
І паложыш скарб у пыл і золата офірскае памеж скалаў цуркоў.
І будзе Ўсеўладны тваім золатам і бліскучым срэбрам у цябе,
І будзе Ўсемагучы скарбам тваім і срэбрам дарагім табе;
бо тады будзеш радавацца ва Ўсеўладным і падымеш да Бога аблічча тваё.
Тады ты пацешышся ў Усемагучым і ўзьнімеш від свой да Бога.
Памолішся Яму, і Ён пачуе цябе, і ты выканаеш абяцаньні твае.
Ты ўчыніш маленьне да Яго, і Ён пачуе цябе, і ты споўніш абятніцы свае.
Замысьліш намер, і ён зьдзейсьніцца ў цябе, над дарогамі тваімі будзе зьзяць сьвятло.
Ты пастановіш пастаноў, і ён станецца, на дарогах тваіх зазіхціць сьвятло.
Калі хто зьнішчаны будзе, ты скажаш: узвышэньне! і Ён уратуе таго, хто панік абліччам,
Як яны паніжацца, то Ты скажаш: "Узвышчася!" Паніклага ачыма Ён спасае.
выбавіць і небязьвіннага, і ён выратуецца чысьцінёю рук тваіх.
Ён вывальняе нявіннага; Ты будзеш вывальнены чысьцінёю рук сваіх».
