Эклезіясціка 8 Эклезіясціка 8 разьдзел

¹ Не спрачайся з чалавекам важным, каб часам не трапіць у яго рукі.

² Не спрачайся з чалавекам багатым, каб часам не паклаў ён на цябе свайго цяжару:

³ золата бо загубіла многіх і срэбра нават сэрца цароў звяло.

⁴ Не спрачайся з чалавекам лапатлівым і не падкідвай дроў у яго агонь.

⁵ Не сябруй з чалавекам неадукаваным, каб не быць пагарджаным князямі.

⁶ Не адцурайся ад чалавека, які адварочваецца ад граху, ані не сварыся на яго; памятай, што мы ўсе заслужылі пакаранне.

⁷ Не ганьбуй чалавека ў яго старасці, бо і некаторыя з нас дачакаюцца старасці.

⁸ Не цешся са смерці ворага свайго; памятай, што мы ўсе паміраем і не хочам ісці з радасцю.

⁹ Не пагарджай апавяданнем мудрых старцаў і цікаўся іх размовамі;

¹⁰ ад іх бо навучышся мудрасці ды разуменню навук і таму, як служыць магнатам без скаргі.

¹¹ Зважай на аповед старцаў, бо яны навучыліся ад сваіх бацькоў;

¹² бо ад іх навучышся розуму і ў адпаведны час дасі адказ.

¹³ Не распальвай вуголля грэшнікаў, сварачыся на іх, і сам не згарай у полымі агню іх.

¹⁴ Не станавіся супраць паклёпніка, каб ён не засеў, быццам засадаю, у вуснах тваіх.

¹⁵ Не пазычай чалавеку важнейшаму за цябе; бо калі пазычыш, лічы гэта за страчанае.

¹⁶ Не заручайся вышэй сваёй магчымасці; бо калі заручыўся, думай, як аддаць.

¹⁷ Не судзіся з суддзёю, бо ў яго волі асудзіць.

¹⁸ З нахабнікам не ідзі ў дарогу, каб ты часам не пагоршыў беды свае: бо ён па волі сваёй будзе весці сябе і ты можаш дзеля яго нахабства прапасці.

¹⁹ Не спрачайся з гняўлівым ды з ім не ідзі ў пустыню, бо кроў для яго нічога не значыць і там, дзе не будзе дапамогі, — знішчыць цябе.

²⁰ Не райся з дурнымі: яны бо не змогуць захаваць сакрэту твайго.

²¹ Перад чужым не адкрывай таямніцы, бо не ведаеш, што ён прыдумае.

²² Не перад кожным чалавекам адкрывай сваё сэрца, каб часам не адштурхнуць ад сябе дабра.