Псалтыр 7 псалом
Псалтыр
Пераклад Васіля Сёмухі → Пераклад Язэпа Германовіча
Песьня-плач, якую Давід сьпяваў Госпаду ў справе Хуса, з племя Веньямінавага.
Лямант Давіда, які ён выспяваў з прычыны Кушы, з пакаленьня Бэньяміна.
Госпадзе Божа мой! на Цябе спадзяваньне маё; уратуй мяне ад усіх маіх ганіцеляў, і вызвалі мяне;
Госпадзі Божа мой! У Цябе мой прыпынак: выбаві мяне ад усіх, што прасьледуюць мяне і вызваль мяне!
хай ня вырве ён душы маёй, быццам леў, які турзае, калі збаўцы няма.
Каб не схапіў душы маей, як леў, і не разарваў, калі няма каму ратаваці.
Госпадзе Божа мой! калі што я зрабіў, калі ёсьць няпраўда ў руках маіх,
Госпадзі Божа мой! Ці ж я ўчыніў гэткае, ці ж прыляпілася злачынства да рук маіх?
калі я ліхам плаціў таму, хто быў у згодзе са мною, — а я ж ратаваў і таго, хто бяз прычыны стаўся маім ворагам,
Ці я зрабіў зло майму дабрадзею — я, што ратаваў і таго, які мне шкодзіў без прычыны?
дык няхай вораг перасьледуе душу маю і дагоніць, і жыцьцё маё хай удратуе ў зямлю, і славу маю хай аберне ў нішто.
Тады няхай мяне гоніць вораг і схопіць, няхай прытопча маё жыцьцё, а чэсьць маю хай у пыл выкіне!
Устань, Госпадзе, у гневе Тваім; паўстань супраць шаленства маіх ворагаў, прачніся дзеля мяне на суд, які Ты прызначыў,
Паўстань, Госпадзе, у тваім гневе! Узьніміся супраць лютасці ўціскаючых мяне: стань за мяне на суд, які Ты запаведаў.
сьціжма людзей стане навокал Цябе; над ёй падыміся ў вышыні.
Няхай абкружаць цябе народы, а Ты засядзь над імі высока!
Гасподзь судзіць народы. Судзі мяне, Госпадзе, паводле праўды маёй, паводле беспахібнасьці маёй.
Госпад судзіць народы. Асудзі мяне, Госпадзе, паводле маей справядлівасьці і паводле маей нявіннасьці, якая ёсць ува мне.
Хай суймецца злосьць бязбожных, а справядлівага ўмацуй, бо Ты выпрабоўваеш сэрца й нутрыну, праведны Божа!
Зваюй злосьць бязбожнікаў і ўмацуй пабожнага, Ты, што пранікаеш сэрца і нутро, Божа справядлівы!
Шчыт мой у Богу, Які шчырых сэрцам ратуе.
Бог ёсьць шчыт мой, Ён збаўляе простых сэрцам.
Бог — судзьдзя справядлівы і Бог — кожны дзень спаганяе сурова,
Бог — Судзьдзя справядлівы, (моцны і доўгацярплівы), Ён штодня — грозны.
калі хто не навяртаецца, Ён вострыць Свой меч, напінае Свой лук і цаляе зь яго;
Калі не навернуцца, меч свой навострыць, лук нацягне і зь яго намерыцца.
рыхтуе яму прылады сьмерці, і вагністымі робіць стрэлы Свае.
Прыгатуе броню смерці: стрэлы свае робіць палючымі.
Вось няпраўду зачаў бязбожны, зацяжарыў крыўдаю і ману сабе спарадзіў,
А (вораг) пачаў ліхое: цяжарны ён злосьцяй і народзіць няпраўду.
капаў дол і выкапаў яго, і ўпаў у яму, якую выкапаў:
Капаў яму і паглыбляе, але сам упадзе ў дол прыгатаваны.
абернецца злосьць ягоная на ягоную галаву, і зладзейства ягонае на цела ягонае ападзе.
Ліха, што задумаў, спадзе на галаву яму, а на цемя яго зваліцца злачынства ягона.
Слаўлю Госпада па праўдзе Ягонай і сьпяваю імю Госпада Ўсявышняга.
Дзякую Госпаду за яго справядлівасьць і псальм сьпяваю Імяні Госпада Найвышэйшага.
