Псалтыр 33 псалом
Псалтыр
Пераклад Васіля Сёмухі → Пераклад Міхаіла Астапчыка
Псальма Давіда, калі ён удаваў зь сябе вар’ята перад Авімэлэхам і быў ад яго выгнаны, і пайшоў.
Псалом Давіда, калі ён зрабіўся непрытомным перад Авімэлехам, І той адпусціў яго, і пайшоў ад яго.
Дабраслаўляю Госпада ва ўсякую пору; хвала Яму няспынная ў вуснах маіх.
На ўсякі час дабраслаўлю Бога, Заўсёды на вуснах маіх хвала Яму.
Госпадам будзе хваліцца душа мая; пачуюць пакорныя і ўзьвяселяцца.
Богам хваліцца душа мая, Да пачуюць незласлівыя і ўзвясяляцца.
Вялічайце Госпада са мною, і ўзносьма імя Ягонае разам.
Разам са мной узвялічым Бога, Разам узнясем імя Ягонае.
Я шукаў Госпада, і Ён пачуў мяне і ад усякіх небясьпекаў маіх вызваліў мяне.
Шукаў Бога і пачуў мяне, І ад усіх бядотаў збавіў мяне.
Хто прыглядваўся да Яго, тыя прасьвятліліся, і твары іхнія ня зьведаюць сораму.
Падыдзіце да Яго і прасвятліціся, І твары вашы не пасаромяцца.
Вось убогі паклікаў, — і Гасподзь пачуў і ўратаваў яго ад усіх ягоных бедаў.
Вось бедны заклікае, і Бог чуе яго, І ад усіх бядотаў збавіць яго.
Гасподні анёл паўстае вакол тых, хто баіцца Яго, — і іх вызваляе.
Паўстане анёл Божы вакол богабаязных І абароніць іх.
Паспытайце і ўбачыце, які добры Гасподзь! Дабрашчасны той чалавек, што на яго спадзяецца!
Пакаштуйце і ўбачце, які добры Бог, Шчаслівы чалавек, што спадзяецца на Яго.
Бойцеся Госпада, усе сьвятыя Ягоныя; бо ня маюць нястачы тыя, што баяцца Яго.
Бойцеся Бога ўсе святыя Яго, Бо не маюць нястачы багабаязныя.
Ільвяняты церпяць нягоды і голад, а богашукальнікі ня церпяць нястачы ні ў якім дабры.
Багатыя згалеюць і запрагнуць, Шукаючыя Бога не пазбавяца аніякага дабра.
Прыйдзеце, дзеці, паслухайце мяне: страху Гасподняму вас навучу.
Падыдзіце, дзеці, паслухайце мяне, Страху Божыю навучу вас.
Ці хоча чалавек жыць і ці любіць дабрадзенства, каб бачыць дабро?
Хто такі чалавек, што жыццця жадае, Што жадае бачыць добрыя дні?
Трымай язык свой ад злога і вусны свае ад падступных словаў.
Ён трымае язык свой ад ліха, І вуснамі сваімі не гаворыць няпраўду.
Ухіляйся ад ліха і рабі дабро; шукай міру і йдзі за ім.
Ён хароніцца ліха і творыць дабро. Ён шукае міра і імкнецца да яго.
Вочы Гасподнія — на праведных, і вушы Ягоныя — на скаргу іхнюю.
Вочы Божыя да правядных, І вушы Яго — да маленняў іх.
А аблічча Гасподняе — супроць тых, што робяць ліхое, каб зьвесьці зь зямлі памяць пра іх.
Бачыць Божа і ліха дзеючых, І панішчыць на зямлі памяць пра іх.
Клічуць, і Гасподзь чуе, і ад усіх уціскаў іх вызваляе.
Заклікнуць правядныя, і Бог пачуе іх, І ад усіх бядотаў іх збавіць.
Блізкі Гасподзь да тых, у каго зламанае сэрца, і пакорлівых духам — уратуе.
Недалёка Бог ад нязлосных сэрцам, І рахманых духам уратуе.
Многа турботаў у праведніка, і ад усіх іх Гасподзь вызваляе.
Шмат бядотаў у правядных, Але ад усіх Бог збавіць іх.
Ён хавае ўсе косткі ягоныя; і ніводная не паламаецца!
Захавае Бог усе косці іх, Ніводная не пакрышыцца.
Зло заб’е грэшніка, і ненавісьнікі праведнасьці загінуць.
Жудасная ў бязбожных смерць, І нянавіснікі правядных грашаць.
Гасподзь вызваліць душу рабоў Сваіх, і не загіне ніхто, хто на Яго спадзяецца.
Уратуе Бог душы рабоў Сваіх, Не грашаць тыя, хто спадзяецца на Яго.
